Дзіцячае свята адбылося ў рамках дабрачыннай акцыі “Согреем детские сердца» у РЦК. Штогод па добрай традыцыі ў краіне ладзіцца такі дабрачынны марафон, падчас якога прадстаўнікі мясцовай улады, кіраўнікі прадпрыемстваў, арганізацый рыхтуюць падарункі выхаванцам інтэрнатных устаноў, дзецям з прыёмных і малазабяспечаных сем’яў, дзецям-інвалідам.
Вось і сёлета павіншаваць  рабят нашага раёна з Калядамі і парадаваць іх падарункамі завіталі госці:  начальнік галоўнага ўпраўлення Нацыянальнага банка Рэспублікі Беларусь, намеснік старшыні абласнога Савета дэпутутаў Раіса Лычкоўская, дырэктар Магілёўскага абласнога аддзялення Рэспубліканскай грамадскай арганізацыі “БДФМ” Ірына Фісюк, намеснік старшыні райвыканкама Надзея Серыкава, настаяцель праваслаўнай царквы ў гонар Бялыніцкай Маці Божай, пратаірэй айцец Сергій і многія іншыя.
З прывітальным словам да прысутных звярнулася начальнік галоўнага ўпраўлення Нацыянальнага банка Рэспублікі Беларусь, намеснік старшыні абласнога Савета дэпутутаў Раіса Лычкоўская. Выхаванцам дома сямейнага тыпу Бялынічаў Раіса Фёдараўна ўручыла арэлі. Яна павіншавала маленькіх жыхароў Прыдрутчыны са святамі і пажадала надоўга захаваць у сваіх сэрцах дзіцячую непасрэднасць і шчырую веру ў цуд.
Прыемны сюрпрыз чакаў і 35 хлопчыкаў і дзяўчынак нашага раёна, якія сталі ўдзельнікамі акцыі і ў снежні мінулага года былі запрошаны на спектакль у Магілёў. У той дзень рабяты ўпрыгожылі святочную “елачку жаданняў” шарыкамі з назвамі сваіх мар. І ўжо сёння запаветныя жаданні кожнага з іх ажыццявіліся. Пасля святочнага канцэрта ўсе дзеці атрымалі падарункі і салодкія пачастункі, якія былі набытыя за кошт сродкаў, сабраных падчас дабрачыннай акцыі.
У сваю чаргу маленькія жыхары райцэнтра падарылі гасцям цудоўныя музычныя нумары. Усмешкі не знікалі з вуснаў дзяцей, бо ў гэты дзень разам з падарункамі яны атрымалі душэўныя адносіны, увагу і цяпло сэрцаў арганізатараў мерапрыемства. Цудоўная святочная казка надоўга застанецца ў іх памяці.