На базе ААТ “Новая Друць” прайшоў чарговы раённы семінар-вучоба па пытаннях арганізацыі ўтрымання буйной рагатай жывёлы, павелічэння вытворчасці малака і падрыхтоўкі машынна-трактарнага парку сельгаспрадпрыемстваў да веснавой сяўбы 2018 года.
    Удзел у ім прынялі старшыня райвыканкама Мікалай КАДАЦЕНКА, начальнік райсельгасхарчу Дзяніс КЕЙЗЕРАЎ, прадстаўнік камітэта па сельскай гаспадарцы і харчаванні аблвыканкама, намеснік генеральнага дырэктара па вытворчасці ААТ “Магілёўхлебапрадукт” Алег МАСЛАК. Кіраўнікі сельгаспрадпрыемстваў раёна, галоўныя заатэхнікі, ветурачы, інжынеры і бухгалтарскія работнікі наведалі два аб’екты ААТ “Новая Друць”: МТК па вытворчасці малака на 900 галоў у вёсцы Ключыкі і машынны двор у аграгарадку Цяхцін.
    На кожным з цэхаў МТК, радзільны і сухастойных кароў, прафілакторый для ўтрымання цялятак, вырошчвання цялушак да 6 і ад 6 да 12 месяцаў, вытворчасці малака, Алег Маслак, указваючы на пэўныя недапрацоўкі, заклікаў прысутных спецыялістаў да выказвання ўласных меркаванняў, дыскусіі, што неабходна для прыняцця правільных рашэнняў. Але тыя больш слухалі, чым гаварылі.
    У цэху радзільным і ўтрымання сухастойных кароў ён, напрыклад, звярнуў увагу на вузкі фронт кармлення жывёлы і прапанаваў запоўніць каровамі свабодную секцыю. Пры гэтым, Алег Рыгоравіч падкрэсліў: тэхналогіі на сучасных комплексах такія, што, калі дзейнічаць бяздумна, не па-гаспадарску, то за некалькі месяцаў можна на гады прычыніць роднаму сельгаспрадпрыемству значную шкоду. Таму кіраўнікам і спецыялістам неабходна думаць, што трэба зрабіць, каб захаваць жывёлу. І прымаць толькі абдуманыя і правільныя рашэнні, у тым ліку і па руху яе на комплексах, працы з маладняком, без якога, як вядома, не бывае і вялікага малака – стратэгічнай сыравіны, нашага “белага золата”. А ў падмурку ўсяго гэтага ляжаць зацікаўленасць кіраўніка, спецыялістаў, работнікаў у выніках сваёй працы, найстражэйшае захаванне тэхналагічных рэгламентаў, што, у сваю чаргу, і прыводзіць да эфектыўнай эканомікі ўсяго сельгаспрадпрыемства. За станоўчым прыкладам нашым гаспадарнікам   за трыдзевяць зямель ездзіць ці хадзіць няма неабходнасці, бо СВК “Калгас “Радзіма” знаходзіцца, як цяпер модна казаць, у крокавай даступнасці.  
    Падчас наведання МТК у Ключыках адпаведным спецыялістам таварыства былі дадзены канкрэтныя   рэкамендацыі па руху жывёлы, якія павінны прымяніць у сваіх гаспадарках і ўсе астатнія ўдзельнікі семінара, за выключэннем СВК “Калгас “Радзіма”, дзе забяспечана ўласная эфектыўная тэхналогія. На пленарным пасяджэнні семінара падведзены вынікі вучобы і ў працяг тэмы павышэння эфектыўнасці малочнай галіны кожнай гаспадарцы былі пастаўлены канкрэтныя тактычныя і стратэгічныя задачы, таксама звярталася ўвага на нюансы тэхналагічнай схемы вырошчвання маладняку БРЖ да трох і шасці месяцаў, рэгламенту раздою навацельных кароў, правільнага падбору рацыёну для розных тэхналагічных груп жывёлы з пастаянным маніторынгам яго, што дазваляе пісьменна ствараць не толькі паўнавартасныя кармавыя сумесі, але і эфектыўна выкарыстоўваць назапашаныя кармы.
    Што ж да наведання машыннага двара таварыства, які, нагадаем, у сёлетнім раённым аглядзе па добраўпарадкаванасці, гатоўнасці рамонтна-абслугоўваючай базы для працы ў зімовых умовах, па падрыхтоўцы машынна-трактарнага парку да вясенне-палявых работ 2018 года заняў другое месца, то ён пакінуў станоўчае ўражанне. Уборачная, глебаапрацоўчая, пасяўная тэхніка і    агрэгаты знаходзяцца ў закрытых боксах. Звяно рамонтнікаў займаецца сваёй справай. Іх праца аплачваецца       па здзельна-прэміяльнай сістэме. Дзеля матэрыяльнага стымулявання зацікаўленасці работнікаў па скарачэнні тэрмінаў выканання рамонтных работ, а таксама за правядзенне іншых відаў іх за абмежаваны тэрмін, прымяняецца акордная аплата працы. Вызначаны таксама надбаўкі, даплаты, прэміі. Усё гэта толькі садзейнічае актыўнасці правядзення рамонтных, падрыхтоўчых работ да веснавой сяўбы.