У райцэнтры пачаў працаваць абноўлены сэрвісны цэнтр РУП “Белтэлекам”
Падчас цырымоніі яго адкрыцця перад супрацоўнікамі і гасцямі выступіў начальнік раённага вузла электрасувязі Шклоўскага занальнага вузла электрасувязі РУП “Белтэлекам” Міхаіл МАРКАЎ. Ён распавёў аб паслугах і прадуктах кампаніі “Белтэлекам”, планах на будучыню. Міхаіл Пятровіч падкрэсліў, што пасля рамонту і перапланіроўкі ўнутранай прасторы сэрвісны цэнтр атрымаў новы фармат, у аснову якога пакладзена стварэнне камфортных і ўтульных умоў для кліентаў.
Сапраўды, тут не будзе ажыццяўляцца прыём плацяжоў, спецыялісты цэнтра максімум увагі ўдзеляць абслугоўванню i кансультацыі пастаянных і новых абанентаў. У сэрвісным цэнтры можна заключыць дагавор на любую паслугу кампаніі “Белтэлекам” ад устаноўкі стацыянарнага тэлефона да падключэння інтэрактыўнага лічбавага тэлебачання ZALA і хуткаснага інтэрнету byfly. Спецыялісты акажуць дапамогу ў выбары адпаведнай паслугі, раскажуць пра яе магчымасці і аформяць адпаведныя дакументы.
Як адзначыла спецыяліст па прадажах Людміла НІКІТЧАНКА, акрамя вядомых прадуктаў, папулярнасць у бялынічан набіраюць і навінкі, такія, як, напрыклад, “Разумны дом”.
Гэта паслуга для тых, хто зацікаўлены ў магчымасці аддалена кантраляваць стан свайго жылля. Яго базавы камплект, напрыклад, уключае абанентскую прыладу (кантролер) і тры датчыкі – задымленасці, руху і адкрыцця дзвярэй/вокнаў. Па інфармацыі Міхаіла Маркава, у Бялынічах ужо 70 абанентаў абсталявалі гэтай сістэмай свае дамы або кватэры, а індывідуальны прадпрымальнік Мікалай МЯЦЕЛІЦА – гандлёвую кропку.