Напрыканцы мінулага тыдня ў міні-кафэ райспажыўтаварыства “Руская тройка” пачалі выпякаць піцу.
    Як паведаміла журналісту раёнкі старшыня райста Тамара АДАМОВІЧ, перад гэтым у міні-кафэ быў праведзены касметычны рамонт, закуплены адмысловая печ для гатавання піцы, у асартыменце якой больш за дзесяць найменняў, сталы і скураныя канапы на тры дзясяткі пасадачных месц, тэлевізар… На ўсё патрачана 15 тысяч рублёў.
    Створана дастаткова ўтульная і прывабная атмасфера, у якой можна адзначаць, прыкладам, сямейныя ўрачыстасці, святы, цудоўна адпачыць. Думаецца, асабліва даспадобы абноўленае міні-кафэ прыйдзецца моладзі. Фактычна, гэта зроблена для яе, і кіраўніцтва райста разлічвае на ініцыятыўную “зваротную сувязь”­, якая не прымусіць сябе доўга чакаць.
    І бармены тут маладыя, прыгожыя, вельмі ўважлівыя – Крысціна АБДЫРАВА, якая мае вышэйшую адукацыю, і нядаўні выпускнік гандлёвага каледжа Юрый САЛАГУБ. Крысціна – бялынічанка, Юрый нарадзіўся ў адной з вёсак Магілёўскага раёна. Прыехаў працаваць у наш горад па размеркаванні. У райста юнака сустрэлі добра, забяспечылі і жыллём.
    Юрый задаволены такім жыццёвым раскладам.
    Звяртае на сябе ўвагу і насычанасць міні-бара “Руская тройка” харчовай прадукцыяй, напіткамі, марожаным…
    Праўленне райспажыўтаварыства зрабіла і яшчэ адзін крок насустрач патэнцыяльным пакупнікам: піцуможна заказаць з бясплатнай дастаўкай на дом.
    Для гатавання піц выкарыстоўваюцца толькі свежыя і карысныя прадукты. А маладыя, прыгожыя бармены, якія любяць сваю працу, могуць дагадзіць самым разнастайным і патрабавальным густам.
    Калектыў міні-кафэ “Руская тройка” спадзяецца, што смак прыгатаванай тут піцы зробіць бялынічан пастаяннымі кліентамі.
Прыемнага апетыту!