У СВК “Калгас “Радзіма” прайшло традыцыйнае свята “Зажынкі”

У мінулую пятніцу ў СВК “Калгас “Радзіма” прайшло традыцыйнае свята “Зажынкі”.
Яно дало старт чарговаму ўборачнаму сезону, хоць папярэдне, спаборнічаючы з прыродай, хлебаробы гаспадаркі літаральна на адным дыханні ўбралі азімы рапс, намалаціўшы масланасення яго больш за паўтары тысячы тон пры ўраджайнасці 36,7 цэнтнера з гектара. На гэта звярнуў увагу на свяце старшыня гаспадаркі Аляксандр ЛАПАЦЕНТАЎ, назваўшы намалот і ўраджайнасць рапсу рэкорднымі для калгаса. Ён сардэчна падзякаваў усім членам уборачных экіпажаў за іх руплівасць, старанную працу і выказаў упэўненасць, што хлебаробы супрацьпаставяць капрызам надвор’я свой вопыт, прафесіяналізм, майстэрства.

– Пра вагу нашага сёлетняга хлебнага караваю пакуль нічога гаварыць не будзем, – сказаў Аляксандр Лапацентаў. – Вынікі падвядзём на нашых “Дажынках”, у нашым амфітэатры. У складзе гаспадаркі зараз захоўваецца яшчэ тысяча тон зерня з 21 з паловай тысячы мінулагодняга ўраджаю. Збожжа, прапушчанае праз жывёлагадоўчую галіну, – і наш бюджэт, і нашы грошы, і наш дастатак. Таму галоўная задача – убраць да апошняга зернятка з усяго, што вырасцілі. А жніво ніколі лёгкім не бывае. Хлеб заўсёды дастаецца цяжка.

Па даўняй традыцыі ўдзельнікі мастацкай самадзейнасці Вішоўскага СЦКіВЧ падтрымалі 12 камбайнавых экіпажаў СВК “Калгас “Радзіма” фальклорна-этнаграфічнай абрадавай праграмай, падчас якой Аляксандру Лапацентаву былі ўручаны хлебны каравай, выпечаны з мукі ўраджаю мінулага года, і жытнёвы сноп з зярняткамі, што вырашчаныя сёлета. Такія ж снапы атрымалі і ўсе экіпажы камбайнаў.

Святар Петрапаўлаўскай царквы а.Павел, прамовіўшы спецыяльную зажынкавую малітву, акрапіў камбайнераў, уборачную тэхніку пасвяцонай вадой і блаславіў хлебаробаў на спорную жнівеньскую працу.
Пасля “Зажынак” уборачныя агрэгаты, тэхніка для адвозкі збожжа новага ўраджаю ўражваючай калонай рушыла на 70-гектарнае пшанічнае поле, што каля вёскі Лічынка.

Масавая ўборка вырашчанага сёлета ўраджаю хлеба ў СВК “Калгас “Радзіма” пачалася.
Чакаем першых “тысячнікаў”!..

← Назад

Наверх→