­

– Збіраем дваіх дзяцей у школу, – кажа Аляксей БОНДАР. – Усёй сям’ёй завіталі ў гандлёвую кропку. Зараз набываем неабходныя канцылярскія прыналежнасці, у планах яшчэ застаюцца абутак і, часткова, элементы школьнага адзення.
Купіць усё неабходнае для школьнікаў і дзетак, якія ходзяць у дзіцячы садзік, можна і ў магазіне « Тавары для дзяцей».
– Да сезона школьных закупак падрыхтаваліся грунтоўна, – распавядае прадавец 6 разрада Ганна КРУПЕНІК.
– Прапаноўваем увесь спектр тавараў: ад ручак і алоўкаў да школьных камплектаў і кашуль, ёсць у нас таксама рукзакі і абутак. Мінімальны набор прадметаў для першакласніка можа каштаваць ад 150 рублёў. Школьная форма ў нашым магазіне знаходзіцца ў цэнавым дыяпазоне ад 20 да 80 рублёў.

Карэспандэнт райгазеты пагутарыла з пакупнікамі, якія збіраюць сваіх дзетак у школы і дзіцячыя садкі, каб даведацца, што ў першую чаргу яны набываюць.
– Збіраю сына ў сёмы клас, – кажа Ірына КАЛОШЫЧ. – Зараз выбралі новы рукзак. Не вельмі танны, але спадзяёмся, што ён доўга праслужыць. Улічваючы тое, што многія неабходныя рэчы засталіся з мінулага навучальнага года, плануем абнавіць іх на суму каля 150 рублёў. У пералік уваходзіць адзенне, абутак, канцтавары.
– Сёлета адпраўляю дачушку ў 1 клас, а сын пойдзе ўпершыню ў дзіцячы садзік, – распавядае Віта КАЗЛОЎСКАЯ. – Спісы прыналежнасцяў, якія могуць ім спатрэбіцца, пакуль не выдалі. Планую набыць новае адзенне для абодвух. Напэўна, для сваёй першакласніцы куплю больш, чым планавала: ёй неабходна школьная форма ў некалькі­х варыянтах. Прыгледзела ўжо спаднічку, сукенку і пінжак. Заўсёды звяртаю ўвагу на якасць тавараў. Айчыннай вытворчасці, здаецца, нават больш якасныя, чым замежныя. Хочацца, каб для дзяцей яны былі зручныя і доўга іх радавалі.

Алена БЫКАВА,
Фота аўтара.

­