Служба ў арміі – значны этап у жыцці кожнага юнака, які прайшоў гэты шлях. У мінулую пятніцу ў РЦК адбыўся Дзень прызыўніка.
У гэты вясенні прызыў 37 хлопцаў будуць накіраваны для праходжання ваеннай службы ў радах Узброеных Сіл Беларусі.
Са словамі шчырых пажаданняў да будучых абаронцаў краіны звярнуліся ваенны камісар Бялыніцкага і Круглянскага раёнаў Мікалай ГАМОЛКА, старшыня раённага грамадскага аб’яднання “Беларускі саюз ветэранаў вайны ў Афганістане” Віктар ПАДОЛЬСКІ, настаяцель храма ў гонар іконы Божай Маці  Бялыніцкай айцец Сергій МАСЛАЎ.
Безумоўна, хвалюючым гэты дзень стаў не толькі для прызыўнікоў, але і для іх бацькоў, сяброў, якія будуць чакаць іх дадому на працягу ўсёй службы.
– Абяцаем выконваць свой армейскі доўг добрасумленна і годна, выхоўваць якасці, неабходныя абаронцу Радзімы, быць выдатнікамі баявой падрыхтоўкі, не запляміць гонар і патрыятычныя традыцыі дзядоў, бацькоў і старэйшых братоў, прымнажаць іх баявую славу, – з гэтымі словамі ад імя ўсіх прызыўнікоў выступіў Аляксандр ШУТОЎ.

Аляксей РАГУЛЁЎ.
Фота аўтара.