На мінулым тыдні на тэрыторыі паляўніча—турыстычнай базы “Глушцова такавішча” прайшлі прафесійныя спаборніцтвы сярод вальшчыкаў лесу ДЛГУ “Бялыніцкі лясгас”. Таксама паказаць свае здольнасці былі запрошаны прадстаўнікі з Быхаўскага, Магілёўскага і Клічаўскага лясгасаў.
– Асноўная задача заключаецца ў тым, каб ацаніць узровень майстэрства кожнага ўдзельніка. Таксама гэта адзін з этапаў падрыхтоўкі да аналагічных абласных спаборніцтваў, дзе мы заўсёды займаем прызавыя месцы, – адзначыў дырэктар лясгаса Юрый ЗАБЛОЦКІ.
Спаборніцтвы складаліся з некалькіх этапаў: мантаж ланцуга бензапілы, распілоўка камбінаваным рэзам, дакладная распілоўка, абрэзка сукоў, валка лесу і эстафета. У выніку, першае агульнакаманднае месца з 2982 баламі заняла каманда Кіраўскага лясніцтва, другімі сталі вальшчыкі брыгады “Кіраўскае” (2901 бал), дружына Цяхцінскага лясніцтва, якая набрала 1993 балы, стала трэцяй.
У асабістым заліку перамогу святкаваў Андрэй БАРОДЗІЧ (Кіраўскае лясніцтва), другім стаў Валерый СІДАРОВІЧ (брыгада “Кіраўскае”), трэцім – Сяргей БАРОДЗІЧ (Кіраўскае лясніцтва).
Юрый Заблоцкі ўручыў пераможцам і прызёрам граматы і грашовыя ўзнагароды. Дарэчы, агульная сума прызавых склала 1850 рублёў. Іржавую пілу і права правядзення наступных спаборніцтваў вальшчыкаў лесу атрымала каманда Акцябрскага лясніцтва, якая ў турніры стала апошняй.
Аляксей РАГУЛЁЎ.
Фота аўтара.
Поделиться: