Па ініцыятыве Ганаровага грамадзяніна Бялыніцкага раёна, старшыні Беларускай федэрацыі гандбола Уладзіміра Канаплёва напярэдадні Новага года арганізавана свята для дзяцей-сірот і дзяцей з асаблівасцямі псіхафізічнага развіцця.
Яго гледачамі і ўдзельнікамі сталі хлопчыкі і дзяўчынкі з прыёмных і апякунскіх сем’яў, выхаванцы сацыяльнах устаноў Бялыніцкага, Круглянскага, Шклоўскага, Магілёўскага раёнаў.
У вялікай зале раённага Цэнтра культуры для рабят была падрыхтавана цікавая канцэртная праграма з удзелам зорак беларускай эстрады і спорту. З задавальненнем юныя гледачы слухалі песні ў выкананні Жанэт, удзельніцы сёлетняга “Славянскага базару” Яўгеніі Кляпіцкай, саліста ВІА “Песняры” Валерыя Скаражонка і гурта “Браты славяне”, артыстаў маладзёжнага тэатра эстрады… Не пакінулі раўнадушнымі малых і дарослых нумары гімнастак, бальныя танцы. Уразіла і выступленне майстра пяскаграфіі Аляксандры Канафальскай. Мастачка прадэманстравала серыю малюнкаў, прысвечаных навагоднім святам.
Арганізатары мерапрыемства падрыхтавалі шэраг сюрпрызаў. Спраўдзілася мара выхаванцаў і гаспадыні дзіцячага дома сямейнага тыпу Святланы Хрушчовай: ім падарылі лічбавы фотаапарат. Шклаўчанка Валерыя Маслянкова з нагоды дня нараджэння таксама атрымала падарунак. Дарэчы, без салодкіх пачастункаў ніхто не пакінуў канцэрт.
Напрыканцы мерапрыемства да прысутных у зале звярнуліся Уладзімір Канаплёў і старшыня райвыканкама Аляксандр Варонін. Яны падзяліліся ўражаннямі ад выступленняў артыстаў, павіншавалі малых, іх выхавальнікаў і бацькоў з надыходзячымі святамі, пажадалі дабрабыту, цярпення, здароўя.
– Прыемна, што мы зноў сабраліся ў гэтай утульнай зале, -- адзначыў Уладзімір Мікалаевіч. – Вашы шчырыя ўсмешкі – пацверджанне запатрабаванасці такіх сустрэч. Спадзяюся яны будуць яшчэ неаднойчы.
(Маргарыта ДУДАЛЬ, “Зара над Друццю”)