На днях адбылася творчая сустрэча жыхароў Бялыніцкага краю са знакамітым паэтам, выхадцам з нашых мясцін Леанідам Сідаравым. Рускамоўны лірык Леанід Цімафеевіч з'яўляецца членам Саюза пісьменнікаў Расіі. Ён аўтар некалькіх зборнікаў вершаў - «Майский снег», «Берестяные облака», «Воспоминанья-лебеди», «Ангел утешения». Зараз паэт жыве і працуе ў Мінску.

Творчая споведзь «Пой, моя душа, во всю стихию» прайшла ў атмасферы спакою і раўнавагі паміж слухачом і аўтарам. Былі прачытаны вершы як самім паэтам, так і вядучымі мерапрыемства. Асноўнай задачай для паэта, па меркаванню Леаніда Цімафеевіча, з'яўляецца магчымасць падарыць вечнае. Падчас бяседы стала зразумелым, што асноўныя тэмы яго творчасці - каханне, адносіны паміж людзьмі, гісторыя, культура, прырода.

Сустрэча стала больш насычанай на эмоцыі, калі прысутныя задавалі лірыку пытанні, або проста дзяліліся сваімі ўражаннямі. У ходзе размовы высветлілася шмат цікавых фактаў: першы верш быў напісаны ў школьныя гады,  любімая пара года – восень, вершы на тэму кахання пішуцца ад імя 1-й асобы таму, што ў большасці з іх паэт апісвае свае асабістыя пачуцці.

         Падчас  гутаркі Леанід Цімафеевіч не раз звяртаў сваю ўвагу на тое,  што трэба добра ведаць гісторыю не толькі свайго краю, але і сусветную. Трэба многа чытаць, пачынаючы з антычнасці і заканчваючы сучаснымі аўтарамі. Не засталася без увагі і гісторыя царквы, якая  дае яму духоўны грунт для творчасці. Менавіта ўсе гэтыя веды і прадэмантраваў слухачам майстар лірычнага жанра Леанід Сідараў.  Ім былі прачытаны вершы з новага зборніка, які яшчэ не пабачыў свет,  такія як «Мотылек печали», «Хромота», «Москва, Москва, что ты творишь?», «Женщина-ветер» і іншыя. Госці сустрэчы разам з паэтам акунуліся ў свет сапраўдных пачуццяў і перажыванняў, бо шчырасць паэзіі, актуальнасць тэм не аставіла нікога раўнадушным.