Малады механізатар Андрэй ЦАБРОЎ – прадстаўнік даволі вядомай у ААТ “Новая Друць” дынастыі аграрыяў. Дзявяты год ён шчыруе ў сельгаставарыстве, памнажаючы працоўныя заслугі сваёй сям’і.
На полі ля вёскі Заазер’е, якому, здаецца, канца краю няма, Андрэй шчыруе поплеч з бацькам, Мікалаем Віктаравічам. Менавіта яго прыклад паўплываў на прафесійны выбар хлопца.
— У нас сапраўдная дынастыя склалася: і бацька, і я, і малодшы брат Алег – механізатары, — прызнаецца малады аграрый. – Мне падабаецца мая прафесія, тэхніка, якой кірую. Я нават і не задумваўся аб нейкай іншай справе, цвёрда вырашыў звязаць сваё жыццё з сельскай гаспадаркай.
Бацька Андрэя часта ўспамінае, як браў маленькага хлопчыка на мехдвор, дазваляў забірацца ў кабіну. Ён добра адчуваў сынаву цягу да тэхнікі.
— Канечне, хачу, каб жыццё сына склалася выдатна, — са шчырай усмешкай расказвае Мікалай Віктаравіч. – Прыемна, што і кіраўніцтва сельгаставарыства Андрэя падтрымлівае: ім з жонкай як маладой сям’і выдзелілі добраўпарадкаванае жыллё ў Вялікай Машчаніцы. Безумоўна, ганаруся сваім сынам!
Андрэй Цаброў, як і іншыя хлебаробы ААТ “Новая Друць”, імкнецца з максімальнай аддачай выкарыстоўваць замацаваную за ім тэхніку. Не губляючы ні хвіліны на энерганасычаным трактары айчыннай вытворчасці ў счэпе з дыскатарам ён апрацоўвае глебу, каб потым калегі маглі пачаць наступны этап пасяўной.
— Зараз самае галоўнае для нас – правесці ўсе неабходныя агратэхнічныя работы за аптымальны тэрмін, — адзначае намеснік дырэктара ААТ “Новая Друць” па раслінаводстве Уладзімір НАПРЭЕНКА. – А з такімі механізатарамі, як Андрэй, своечасова завяршым сяўбу. Мы ўпэўненыя ў здольнасцях гэтага надзейнага працаўніка, таму без сумненняў давяраем яму складаную тэхніку.
Андрэй КРАМКОЎ, прафесіянал, які задае тон у пасяўной, не аднойчы назіраў за працай руплівага механізатара і можа многае пра яго расказаць.
— Адразу бачна, што малады калега стараецца, прыкладае ўсе намаганні, каб працаваць якасна, — гаворыць Андрэй Сяргеевіч. – Спадзяюся, што ён і далей будзе развіваць сваё майстэрства, з гонарам працягваць сямейную справу.

Вольга ГОЛЬЦАВА.