Адходы жыццядзейнасці, якія шматкроць павялічваюцца з кожным годам, наносяць непапраўную шкоду экалагічнаму стану навакольнага асяроддзя. Таму збор і перапрацоўка другаснай сыравіны – важная справа, да якой неабходна далучыцца кожнаму.
За  2015 год калектывы арганізацый, устаноў, прадпрыемстваў і гаспадарак раёна здалі 359,5 тоны адходаў шкла пры заданні 338 тон (106,3% гадавога задання), палімерных – 131,3 тоны (101,7%), тэкстыльных – 20,76 тоны (103,8%), зношаных аўтамабільных шын – 174,24 тоны пры гадавым заданні 166 тон. Скарыстанай паперы і кардону ў пункты прыёму здадзена 663,6 тоны (73,7 %).
БУКП “Жылкамгас” – вядучае прадпрыемства, якое займаецца зборам, дасартоўкай і ўтылізацыяй адходаў. Кіраўніцтва яго звяртае ўвагу насельніцтва на неабходнасць раздзельнага збору бытавога смецця. Усяго ў райцэнтры, аграгарадках і буйных вёсках  устаноўлены 487 кантэйнераў для раздзельнага збору другаснай сыравіны. У тым ліку для збору макулатуры  – 32, шкла – 208, палімераў – 231.
Культура беражлівых адносінаў да рэчаў, якімі мы карыстаемся ў паўсядзённым жыцці і правільнае абыходжанне з другаснымі матэрыяльнымі рэсурсамі, своечасовы іх збор і перапрацоўка дазваляюць не толькі знізіць выдаткі на сыравіну для вытворчасці новай прадукцыі, але і зробяць край, у якім мы жывём, чыстым, прыгожым, светлым куточкам для нас і нашых нашчадкаў.

Святлана МАГІЛЕЎЧЫК.