– Усебеларускі народны сход – гэта агульнанацыянальны форум, на якім, як і раней, будуць адкрыта абмяркоўвацца пытанні, што востра стаяць на парадку дня і патрабуюць вырашэння, планы на будучыню, прыярытэты ўнутранай і знешняй палітыкі. Грунтоўная размова і рашэнні, якія будуць прынятыя на сходзе, паспрыяюць развіццю ўсіх галін народнай гаспадаркі і дадуць станоўчы зарад для паспяховай работы ў наступнай пяцігодцы.
Акрамя таго, народны сход падвядзе вынік развіцця нашай дзяржавы за пяцігоддзе. І трэба адзначыць, што краіна і грамадства пастаянна і паступальна рухаюцца наперад. Павышаецца якасць жыцця людзей, добраўпарадкоўваюцца гарады і сельскія населеныя пункты. Беларусь па-сапраўднаму ператварылася ў еўрапейскую краіну.
Мне ўпершыню выпаў гонар удзельнічаць ва Усебеларускім народным сходзе. Быць у ліку дэлегатаў такога высокага форуму, сапраўды, вельмі адказна для мяне як грамадзяніна і як кіраўніка. Для кожнага калектыву важна суаднесці канцэпцыю развіцця свайго прадпрыемства з той, якая будзе вызначана на сходзе, падвесці вынікі таго, што зроблена за пяцігодку.
ДУК ДБП “Бялыніцкая ПМК-241” застаецца лідзіруючай арганізацыяй у будаўнічай галіне Магілёўскай вобласці, паспяхова выконвае пастаўленыя перад ёй задачы. Прадпрыемства мае дастатковыя вытворчыя магутнасці для выканання будаўніча-мантажных работ рознага прызначэння.
Для павышэння якасці будаўнічых работ і для абнаўлення сродкаў вытворчасці прадпрыемства за апошнія пяць гадоў інвестыцыі ў асноўны капітал перавысілі 17,1 млрд рублёў. Аб’ём будаўніча-мантажных работ, выкананых уласнымі сіламі, за пяць гадоў склаў 419,5 млрд рублёў, за 2015 год – 104,1 млрд руб., або 162,3% да ўзроўню 2011 года. Выручка ад рэалізацыі прадукцыі, тавараў, работ і паслуг за пяцігодку дасягнула 536 млрд рублёў, з якіх за апошні год – 135,6 млрд.
Упэўнены, што на пятым Усебеларускім народным сходзе перш за ўсё размова пойдзе аб рашэнні эканамічных задач, якія стаяць перад нашай краінай. Будуць абмеркаваны актуальныя пытанні Праграмы сацыяльна-эканамічнага развіцця краіны на 2016-2020 гады, пастаўлены задачы па яе выкананні. А будаўніцтва, як вядома, гэта лакаматыў, які цягне за сабой усю эканоміку.
Разам з тым, для таго, каб сёння дабівацца вынікаў у будаўнічай галіне, неабходна быць актыўным у пошуку новых заказчыкаў і будаўнічых пляцовак, пашыраць геаграфію супрацоўніцтва, павялічваць аб’ёмы заказаў і забяспечваць поўную загрузку вытворчых магутнасцяў прадпрыемства. ДУК ДБП “Бялыніцкая ПМК-241” прымае ўсе
неабходныя меры па зніжэнні сабекошту вырабленай прадукцыі, каб паспяхова канкурыраваць на рынку будаўнічых паслуг.