Выстава стане 20-й па ліку і заключнай, праведзенай у рамках выязнога арт-праекта “Аб творчасці, каханні і аб самай звычайнай глыбінцы”. З творамі гэтай выязной выставы пазнаёміліся жыхары Бялынічаў, Круглага, Шклова, Горак, Чавусаў, Мсціслаўя, Дрыбіна, Касцюковічаў, Клімавічаў, Клічава, Краснаполля, Глуска, Хоцімска, Слаўгарада, Быхава, Чэрыкава, Бабруйска, Асіповічаў і Магілёва.
Выязны арт-праект мастачкі “Аб творчасці, каханні і аб самай звычайнай глыбінцы” з’явіўся адметнай спробай раскрыць перад гледачамі прыгажосць і непаўторнасць нашага паўсядзённага існавання, якое падаецца будзённым, шэрым, бо перастаем заўважаць і цаніць усю тую багатую гармонію, якую дае чалавеку жыццё ва ўзаемнай сувязі з прыродай, праца на зямлі, адчуванне сябе непадзельнай часткай жыццёвага ўкладу, што складваўся цягам папярэдніх стагоддзяў.
Мэтай праекта стала жаданне Ларысы Журавовіч адрадзіць павагу да народнага побыту, традыцыйнай народнай культуры, працы на зямлі, да простага чалавека.
У праекце часткова прадстаўлены серыі работ, створаных мастачкай за апошнія гады: “Бацькоўскі дом”, “Родныя пейзажы”, “Вясеннія дні”, “Маё дзяцінства”, цыкл партрэтаў “Землякі”.
На заключнай выставе ў Мінску, якая адкрыецца 12 ліпеня а 17-й гадзіне, бу-дзе прадстаўлена каля 35 твораў Ларысы Журавовіч.
Міхась КАРПЕЧАНКА.