Версия для печатиМаска, антысептык, дыстанцыя: тое, што нельга ігнараваць
Аб’екты гандлю, пошта, банкі – месцы, якія найбольш наведваюць людзі. У сувязі з гэтым зараз яны з’яўляюцца і небяспечныміў плане распаўсюджвання вірусных інфекцый, у тым ліку СOVID-19. Карэспандэнт «Зары над Друццю» сумесна з памочнікам урача-гігіеніста райЦГЭ Алай ІВУЛЁВАЙ адправілася ў рэйд па самых масавых месцах наведвання гараджанамі.
У верасні 2020 года Міністэрства аховы здароўя Беларусі зацвердзіла новы пералік супрацьэпідэмічных мерапрыемстваў, абавязковых да выканання падчас каранавіруснай пандэміі. Таму ўдзельнікі рэйду асаблівую ўвагу надалі іх выкананню, у ліку якіх выкарыстанне работнікамі сферы абслугоўвання ахоўных масак і пальчатак, наяўнасць у гандлёвых аб’ектах антысептыкаў, разметкі, што нагадвае аб неабходнасці захавання сацыяльнай дыстанцыі.
– У мэтах бяспекі пакупнікоў павінны сістэматычна апрацоўвацца дэзрастворам прадуктовыя кошыкі, ручкі дзвярэй, ячэйкі для захоўвання рэчаў, касавыя апараты, аплатныя тэрміналы і іншыя кантактныя паверхні кожныя дзве гадзіны, – распавядае журналісту Ала Івулёва. – Яшчэ вельмі важна ва ўстановах і арганізацыях весці журнал кантролю тэмпературы цела, праводзіць штодзённую ацэнку стану здароўя і не дапускаць да працы работнікаў з прыкметамі прастудных захворванняў.
Магазіны харчовых тавараў «Хіт» першымі для наведвання выбралі невыпадкова. Пакупнікоў тут заўсёды шмат. Адпаведна, і да мер бяспекі патрабаванні павышаныя. Ала Івулёва адзначае, што антысептык для апрацоўкі рук на ўваходзе ёсць, прадаўцы працуюць у масках і пальчатках, аднак гэтага нельга сказаць аб пакупніках.
– Людзей у масках, самі бачыце, вельмі мала. Часцей за ўсё са сродкамі абароны ў гандлёвую кропку прыходзяць пажылыя людзі. Антысептыкам пакупнікі таксама карыстаюцца нячаста, – дзеліцца назіраннямі памочнік урача-гігіеніста.
І праўда, з некалькіх дзясяткаў пакупнікоў, якіх мы сустрэлі ў гэтых магазінах, у масках было менш за палову, антысептыкам большасць з іх карыстаюцца не на ўваходзе, а на выхадзе. Пальчаткі зусім не запатрабаваныя. Хоць, выбіраючы садавіну і гародніну, выкладку якіх дапускаецца рабіць без пакеціравання, мы дакранаемся да тавара, розных паверхняў і г.д., і, цалкам магчыма, разносім вірус.
Варта адзначыць, што ў адпаведнасці з санітарнымі нормамі хлебабулачныя вырабы, печыва, арэхі, фісташкі і іншыя прадукты харчавання, якія ўжываюцца без мыцця і апрацоўкі, прадаюцца толькі ва ўпакаваным выглядзе.
Грэбуюць пакупнікі не толькі маскамі і пальчаткамі, але і каляровымі палосамі на падлозе, якія сігналізуюць: трымай дыстанцыю! Амаль у кожным аб’екце, які мы наведалі, на заўвагі памочніка ўрача-гігіеніста райЦГЭ большасць наведвальнікаў рэагавала не вельмі прыязна.
А вось у цырульні ААТ «Бытпаслугі г. Бялынічы» ўсе майстры і наведвальнікі выконваюць патрабаванні супрацьэпідэмічных прадпісанняў, што адзначылі ўдзельнікі рэйду.
У цэлым, каля ўваходаў ва ўсе гандлёвыя аб’екты і месцы масавага збору людзей размешчаны інфармацыйныя лісты, якія нагадваюць пра пагрозу COVID-19 і мерах прафілактыкі вірусных захворванняў.
Падчас рэйду былі выяўлены і парушэнні. Напрыклад, у аддзяленні Белпошты адсутнічала разметка для забеспячэння дыстанцыі паміж наведвальнікамі, па гэтай прычыне людзі стаялі ў шчыльнай чарзе, не ўсе карысталіся і маскамі. У памяшканні аўтастанцыі ў дазатарах адсутнічаў антысептык, а касір на працоўным месцы знаходзілася без маскі.
Некаторыя з парушальнікаў масачнага рэжыму кажуць, што ў масках ім нязручна, іншыя вырашылі, што яны ўвогуле бескарысныя, трэція разлічваюць на імунітэт, паколькі нядаўна перахварэлі.
Вось толькі неабачлівыя грама-дзяне забываюць, што каранавірус можа працякаць бессімптомна: чалавек пра яго не ведае, а «раздае» інфекцыю навакольным. Менавіта таму насіць маскі рэкамендуецца абсалютна ўсім. Прычым, яны па-вінны закрываць і рот, і нос.
Паводле слоў спецыяліста санітарнай службы, такія парушэнні тыповыя і для іншых аб’ектаў масавага збору людзей, што ў выніку спрыяе росту выпадкаў інфекцыі COVID-19.
– Пры выяўленні парушэнняў сані-тарна-эпідэміялагічнага заканадаўства райЦГЭ дае рэкамендацыі або прадпісанне аб прыпыненні працы і паслуг аб’екта, пакуль парушэнні не будуць выпраўлены, – распавяла в.а. галоўнага санітарнага ўрача райЦГЭ Юлія ЛАЗОЎСКАЯ. – І толькі пры ігнараванні дадзеных рэкамендацый прадугледжваецца адміністрацыйная адказнасць для вінаватых службовых асоб. У параўнанні з летнім перыядам зараз назіраецца павелічэнне захворвання на каранавірусную інфекцыю.
Яшчэ 6 красавіка 2020 года райвыканкамам было прынята рашэнне №7-2 аб мерапрыемствах па прафілактыцы і зніжэнні распаўсю-джвання ВРІ, у тым ліку выкліканых каранавіруснай інфекцыяй COVID-19, – дадала Юлія Лазоўская. – Таксама ў сілу ўступіла распараджэнне райвыканкама №145-р аб вызначэнні прафілактычных мер. Гэтымі рашэннямі зацверджаны план мерапрыемстваў для ўсіх суб’ектаў гаспадарання. Першы пункт дадзенага рашэння – захаванне насель-ніцтвам масачнага рэжыму пры наведванні аб’ектаў масавага збору людзей.
Фота аўтара.
Поделиться:
