У Магілёўскай вобласці з 3 па 11 чэрвеня пройдуць маштабныя ваенныя вучэнні. Яны будуць насіць мабілізацыйны характар. Іх галоўная задача – ацаніць ступень гатоўнасці мясцовых выканаўчых органаў, ваенных камісарыятаў, дзяржорганаў і арганізацый, якія выконваюць заданне па мабілізацыі насельніцтва ў выпадку аб’яўлення надзвычайнага становішча. Напярэдадні гэтага сур’ёзнага мерапрыемства карэспандэнт «Зары над Друццю» пагаварыў з ваенным камісарам Бялыніцкага і Круглянскага раёнаў Дзмітрыем ДРАЗДОВЫМ.

– Колькі жыхароў Бялыніччыны будзе задзейнічана ў вучэннях?

– Нягледзячы на тое, што галоўная мэта вучэнняў – праверыць ход выканання мабiлiзацыйных заданняў у выпадку неабходнасці, мы прызавём толькі 11 чалавек. Яны азнаёмлены і ўжо рыхтуюцца да выканання ўскладзеных на іх задач. Усім ваеннаабавязаным уручаны павесткі, па іх трэба будзе з’явіцца ў райваенкамат і адзначыцца там.

– Хто будзе прымаць удзел у вучэннях?

– Гэта будуць падраздзяленні сіл спецыяльных аперацый Узброеных сіл Рэспублікі Беларусь. Калі наша задача – выканаць мабілізацыйнае заданне, то іх задача – максімальна перашкодзіць гэтаму, зразумела, умоўна.

– Якім чынам?

– Любымі дыверсійнымі спосабамі. Ад захопу камісарыятаў, мініравання аб’ектаў, знішчэння вузлоў сувязі да выкрадання і ліквідацыі кіруючага складу. Усё гэта ўмоўна, вядома. Тым не менш, выкарыстанне выбуховых пакетаў, светлашумавых гранат, халастых патронаў і іншых спецсродкаў дапускаецца. Нас чакае насычаны тыдзень вучэнняў, мы ў кругласутачным рэжыме будзем выконваць сваю задачу, а спецназ – сваю. Хацеў бы звярнуцца да жыхароў раёна, калі будуць чутны выбухі і падобнае, не трэба хвалявацца, гэта проста вучэнні.

– Якую ролю ў вучэннях будзе адыгрываць адміністрацыя нашага раёна?

– Галоўную, бо гэта ў першую чаргу вучэнні для іх. Ваенкамат толькі інструмент, які дапамагае вертыкалі ўлады выканаць мабілізацыйныя заданні ў выпадку неабходнасці. Такая ж задача на час вучэнняў будзе і ў іншых сілавых ведамстваў: МУС, МНС і г.д. Паверце, ва ўмовах, калі прафесіяналы сваёй справы будуць перашкаджаць усімі даступнымі метадамі і спосабамі, выканаць пастаўленую задачу будзе вельмі няпроста. Да таго ж, увесь час варта чакаць ад кіраўніцтва вучэнняў новых уводных, якія будуць патрабаваць аператыўных рашэнняў і дзеянняў ад усіх тых, хто будзе ўдзельнічаць у вучэннях у такой шырокамаштабнай аперацыі.

Дзмітрый ЦІХАНАЎ.
Фота аўтара.

zara.by