На днях у Бялыніцкім раёне прайшоў турыстычны злёт школьнікаў. Трынаццаць каманд з ліку вучняў агульнаадукацыйных навучальных устаноў Прыдруцкага краю змагаліся за перамогу. На беразе ракі Вабіч, паблізу вёскі Лебядзянка, яны разам з настаўнікамі разбілі сапраўдны паходны гарадок: устанавілі палаткі, расклалі вогнішча, абсталявалі кухню, устанавілі стэнды з прэзентацыяй сваіх каманд…
Хлопцы і дзяўчаты пераадольвалі доўгую і кароткую дыстанцыі з элементамі арыентавання на мясцовасці, шукалі пікеты, аказвалі першую медыцынскую дапамогу, перапраўляліся праз раку; удзельнічалі ў творчых і інтэлектуальных конкурсах – спявалі песні, адказвалі на пытанні віктарыны…
Першы сакратар райкама ГА “БРСМ” Вольга Шкундалёва правяла сярод юных турыстаў конкурс на лепшы слоган, прысвечаны Году беражлівасці. Хлопчыкі і дзяўчынкі прадаставілі на суд журы разнастайныя цікавыя ідэі. Найбольш змястоўныя і ўдалыя з іх склалі дружыны Машчаніцкай СШ, СШ № 1 імя М. І. Пашкоўскага і СШ № 2.
Па выніках усіх конкурсаў першае агульнакаманднае месца ў турыстычным злёце занялі прадстаўнікі СШ № 2 і Іскраўска БШ, другімі сталі юныя турысты з  Свяцілавіцкага ВПК ДССШ і Кудзінскай БШ, на трэцяй прыступцы п’едэстала гонару размясціліся дружыны Тяхцінскага ВПК ДССШ і Навасёлкаўскага ВПК ДСБШ.
­
­
­