У мінулую суботу, падчас правядзення дня грамадзянскай абароны, у парку-адпачынку “Ліпавы Гай” сабраліся працоўныя калектывы арганізацый, прадпрыемстваў і гаспадарак нашага раёна, каб прадэманстраваць сваю тэарэтычную і практычную падрыхтаванасць да ўзнікнення той ці іншай надзвычайнай сітуацыі. Распачалося штогадовае маштабнае мерапрыемства з агульнага пастраення. З прамовай да прысутных звярнуўся старшыня райвыканкама Аляксандр Варонін, які падкрэсліў, што шматлікія вучэнні падчас правядзення дня грамадзянскай абароны садзейнічаюць павышэнню гатоўнасці органаў кіравання і грамадзянскіх фарміраванняў да абароны насельніцтва, аб’ектаў і тэрыторый падчас экстрымальных сітуацый.  
Фарміраванням грамадзянскай абароны давялося пераадоліць шэраг этапаў. Былі арганізаваны спаборніцтвы санітарных і добраахвотных пажарных дружын, падраздзяленняў аддзела па надзвычайных сітуацыях, пастоў радыяцыйна-хімічнага назірання і разведкі, механізаваных аварыйна-выратавальных звёнаў, спартыўных каманд і дружын мастацкай самадзейнасці.
    Апроч таго, механізаваныя звёны арганізацый здзейснілі шэраг рамонтных работ па вуліцах Бялынічаў і іншых населеных пунктаў раёна, у прыватнасці,  ліквідавалі аварыйныя дрэвы і зрабілі ямачны рамонт.
Падчас правядзення вучэнняў сілы ГА удала выканалі заданні, паказалі добрую падрыхтаванасць да ўзнікнення разнастайных надзвычайных сітуацый. Шмат карысных і важных ведаў атрымалі ў гэты дзень усе удзельнікі спаборніцтваў.
Завяршылася мерапрыемства цырымоніяй узнагароджвання лепшых фарміраванняў ГА. Так, выдатных вынікаў на розных этапах дасягнулі работнікі ПМК-241, якія сталі мацнейшымі ў спаборніцтвах санітарных і добраахвотных пажарных дружын, а таксама ў конкурсе мастацкай самадзейнасці. Сярод раённых выратавальных звёнаў першае месца заваявалі прадстаўнікі ААТ “Падзевічы”. Сярод механізаваных аварыйна-выратавальных звёнаў і пастоў радыяцыйна-хімічнага назірання і разведкі перамогу святкавалі працаўнікі “Жылкамгаса”. Лепшай спартыўнай камандай прызнана дружына аддзела адукацыі райвыканкама. Сярод падраздзяленняў аддзела па надзвычайных сітуацыях пераможцам стаў калектыў ПАВП №11 аграгарадка Вялікая  Машчаніца.  
У агульнакамандным заліку сярод арганізацый невытворчай сферы перамогу святкавалі работнікі СШ №2, вытворчай – дружына ПМК-241. Сярод сельгаспрадпрыемстваў не было роўных ААТ “Новая Друць”. Сярод сельскіх Саветаў мацнейшай аказалася каманда Цяхцінскага Сельскага савета.