У Бялынічах прайшла традыцыйная жнівеньская канферэнцыя педагагічных работнікаў. У зале РЦК сабраліся калектывы школ, дашкольных і пазашкольных устаноў, ветэраны педагагічнай нівы, маладыя спецыялісты, прадстаўнікі мясцовай улады, кіраўнікі арганізацый, прадпрыемстваў і гаспадарак Прыдрутчыны. Распачалося мерапрыемства з прагляду фільма аб дасягненнях сістэмы адукацыі раёна за мінулы навучальны год. Пасля начальнік аддзела адукацыі, спорту і турызму райвыканкама Лідзія Шчацінка прааналізавала становішча галіны, адзначыла станоўчыя вынікі дзейнасці і творчасці педагогаў, звярнула ўвагу на некаторыя недахопы, якія існуюць у адукацыйным і выхаваўчым працэсах, агучыла задачы на будучае.
    У сваім прывітальным слове намеснік старшыні райвыканкама Надзея Серыкава павіншавала педагагічных работнікаў з чарговым новым этапам ў іх працы, пажадала ім далейшых прафесійных поспехаў, а таксама закцэнтавала ўвагу прысутных на пастаўленых кіраўніком краіны задачах на будучы навучальны год.
На канферэнцыі былі ўзнагароджаны лепшыя педагагічныя калектывы, пераможцы раённага агляду-конкурсу “Навучальная ўстанова ўзорнага парадку”, адзначана мэтанакіраваная работа настаўнікаў па выхаванні і навучанні дзяцей. Педагогам уручаны граматы і дыпломы Упраўлення адукацыі аблвыканкама, раённага выканаўчага камітэта, аддзела адукацыі, спорту і турызму райвыканкама, раённага Савета дэпутатаў. Апроч таго, не засталіся без увагі ветэраны педагагічнай нівы Бялыніччыны і маладыя спецыялісты, якія распачнуць сёлета сваю працоўную біяграфію ў нашым раёне.
Для педагогаў Прыдрутчыны раённая канферэнцыя стала стартам у новы навучальны год, у смелыя планы і праекты, рэалізацыя якіх патрабуе руплівай працы і вялікага прафесійнага вопыту. Не сумняваемся, што ў іх усё атрымаецца.