Урачыстае адкрыццё малітоўнага пакою ў гонар свяціцеля Лукі, хірурга, прафесара медыцыны Война-Ясенецкага адбылося ў цэнтральнай раённай бальніцы.
Медыцынскія работнікі даўно марылі аб стварэнні ў ЦРБ малітоўнага пакоя, куды б яны, пацыенты, іх родныя маглі прыйсці памаліцца, прыняць удзел у рэлігіёзных абрадах, сустрэцца са свяшчэннаслужыцелямі. І вось у красавіку з благаславення Епіскапа Магілёўскага і Мсціслаўскага, уладыкі Сафронія распачаліся падрыхтоўчыя работы.
Як падкрэсліў галоўны ўрач ЦРБ Віктар Пянькоўскі, лячэнне цялеснае ў цесным спалучэнні з лячэннем духоўным – вось асноўная мэта адкрыцця ў бальніцы малітоўнага пакоя. Тут  будуць праходзіць шматлікія рэлігіёзныя абрады, а пасля адкрыцця радзільнага аддзялення жыхары раёна змогуць ахрэсціць тут сваіх дзяцей.
Дарэчы, ёсць у малітоўным пакоі і ікона свяціцеля Лукі Крымскага, у гонар якога і названы пакой. Архіепіскап Лука, прафесар медыцыны Война-Ясенецкі з’яўляецца заступнікам усёй медыцынскай навукі і іншых прыродазнаўчых навук, звязаных з ёй. У першую чаргу, хірургіі. Малітва перад гэтай іконай дапаможа і ўрачу падчас складанай аперацыі, і самому хвораму, якога чакае хірургічнае ўмяшанне.