Абласны семінар-нарада па пчалярстве адбыўся ў Бялынічах. Удзел у ім прынялі начальнік аддзела інтэнсіфікацыі жывёлаводства і племянной справы камітэта па сельскай гаспадарцы і харчаванню Магілёўскага абласнога выканаўчага камітэта Валерый Журко, начальнік упраўлення па сельскай гаспадарцы і харчаванню Бялыніцкага райвыканкама Аляксей Цапко, галоўныя ветэрынарныя ўрачы і спецыялісты па пчалярстве Магілёўскай і Віцебскай абласцей.
Са справаздачай аб стане пчалярства ў Магілёўскай вобласці выступіў старшыня рэспубліканскай галіновай асацыяцыі «Пчала і Мёд» Андрэй Шушаначаў. Апошнія гады ўсё больш увагі надаецца развіццю мядовай індустрыі. На сённяшні дзень на тэрыторыі Магілёўшчыны вытворчасцю янтарнага ласунку займаюцца 64 сельгасагранізацыі. У гэтых гаспадарках налічваецца 2 766 пчаліных сем’яў. Акрамя таго, “салодкае золата” атрымліваюць у лясгасах.
Асаблівы акцэнт у сваёй справаздачы Андрэй Шушаначаў зрабіў на праблемных пытаннях пчалярства. Так, нявырашанай на сённяшні дзень застаецца праблема недастатковай колькасці кваліфікаваных кадравых работнікаў на пчолагадавальніках. Апроч таго, не ў поўнай ступені выконваюцца заданні па планавым павелічэнні колькасці пчаліных сем’яў. Ёсць пэўныя цяжкасці і ў рэалізацыі мёду.   
У ходзе семінара прысутныя абмеркавалі перспектыўныя планы развіцця галіны, разгледзелі новыя тэхналогіі ўтрымання пчол і  асаблівасці эфектыўнай племянной работы. Заключнай часткай мерапрыемства стала экскурсія на СФГ “Бялыніцкі пчолагадавальнік”, дзе спецыялісты-пчаляры падвялі вынікі работы семінара.