Адбылося чарговае пасяджэнне камісіі па справах непаўналетніх. На ім быў разгледжаны шэраг адміністрацыйных пратаколаў, складзеных супрацоўнікамі праваахоўных органаў, і справа па адабранні непаўналетняга згодна Дэкрэту Прэзідэнта Беларусі №18.
Дваццацішасцігадовая жыхарка вёскі Хвойна Наталля Таланава ўжо не раз запрашалася на пасяджэнні камісіі. З 2008 года яна знаходзіцца на ўліку ва ўрача-нарколага і пад пільным кантролем зацікаўленых службаў. Распіццё спіртных напояў і знаходжанне ў нецвярозым стане ў грамадскім месцы – звыклы лад жыцця для жанчыны. Першае дзіця ў гора-маці па Дэкрэту №18 адабралі. Сёлета ж яна нарадзіла яшчэ адно, аднак станавіцца на шлях выпраўлення не збіраецца. Васьмімесячнае немаўляці знаходзіцца ў сацыяльна-небяспечным становішчы.   
Члены камісіі аднагалосна прынялі рашэнне аб пазбаўленні Наталлі Таланавай бацькоўскіх правоў. Маленькі Данік будзе накіраваны ў Магілёўскі спецыялізаваны дом дзіцяці. Аднак у жанчыны яшчэ ёсць апошні шанс поўнасцю змяніць сітуацыю і самастойна выхоўваць сваю крывіначку. Калі яна на працягу шасці месяцаў зробіць правільныя для сябе вынікі, працаўладкуецца, будзе наведваць сваё дзіцяці ў сацыяльнай установе - непаўналетняга хлопчыка ёй вернуць.
Таксама на пасяджэнні разглядаліся адміністрацыйныя пратаколы, якія  складзены ў адносінах да бацькоў 2-х непаўналетніх жыхароў вёскі Навасёлкі Ланькаўскага сельсавета:  васьмігадовага Аляксандра Андрыянава і дзесяцігадовага Анатоля Федасеева. Падчас летніх канікул хлопчыкі ўчынілі крадзёж у магазіне Бялыніцкага райста “Тавары для дзяцей” на суму 380 800 рублёў. Маленькія парушальнікі закону не паспелі ўцячы з месца злачынства і былі затрыманы праваахоўнымі органамі. Іх бацькам прыйдзецца выплаціць штраф у памеры 1 базавай велічыні.
Падводзячы вынікі пасяджэння, старшыня камісіі па справах непаўналетніх Надзея Серыкава падкрэсліла: паводзіны падлеткаў у грамадстве ў асноўным залежаць ад таго, наколькі  цікавым і насычаным на карысныя справы будзе іх вольны час. Бацькі павінны забяспечыць сваім дзецям належныя ўмовы для пражывання,  выхавання і самаразвіцця,  каб тыя ніколі не пераступалі мяжу закону.