У мінулую суботу адбылося свята арагарадка Іскра пад назвай “З любоўю да родных мясцін”. На пляцоўцы каля адміністрацыйнага будынка СВК “Ількавічы” з самай раніцы маляўніча размясціліся сялянскія падворкі, выставы майстроў народнай творчасці, дзейнічалі гандлёвыя рады, гульнёвыя пляцоўкі і атракцыёны.  
    На ўрачыстасць завіталі ганаровыя госці: намеснікі старшыні Бялыніцкага раённага выканаўчага камітэта Аляксей Цапко і Надзея Серыкава, дырэктар ПМК-241 Уладзімір Раманенка, дырэктар Аўтапарка №7 Сяргей Гапееў, старшыня райкама  прафсаюза работнікаў АПК Рыгор Барысёнак, выхадцы з навакольных вёсак Віктар Падашэўка, Віктар Кунцэвіч, Анатоль Шпількоў і многія іншыя.     
Шмат цёплых віншаванняў у гэты дзень прымалі іскроўцы.  Старшыня СВК “Ількавічы” Віктар Крыванос выказаў удзячнасць усім працаўнікам гаспадаркі за прафесіяналізм і адданасць сваёй справе і пажадаў новых працоўных дасягненняў.  
    Падчас урачыстасці ўзгадваліся цікавыя факты з гісторыі вёскі, успаміналі ветэранаў і перадавікоў вытворчасці. Каштоўныя падарункі атрымалі лепшыя работнікі сельскай гаспадаркі і ветэраны працы, маладыя сем'і, доўгажыхары.  
Сваімі жартамі, песнямі, танцавальнымі нумарамі парадавалі прысутных творчыя калектывы Бялыніцкай цэнтралізаванай клубнай сістэмы. Свята прадэманстравала сапраўдную павагу і любоў мясцовых жыхароў да сваёй роднай вёскі. Добрае, светлае, вясёлае, яно надоўга застанецца ў памяці “іскроўцаў”.