Прэзідэнт Беларусі падпісаў Указ № 551, які ўносіць змены і дапаўненні, што тычацца правілаў вядзення паляўнічай гаспадаркі і палявання.
Дзеля спрашчэння працэдуры набыцця паляўнічымі пуцёвак прадугледжваецца іх рэалізацыя праз інтэрнэт. Уносяцца змены і ў адміністрацыйную працэдуру выдачы пасведчання на права палявання, сутнасць якіх заключаецца ў абавязковасці прахаджэння падрыхтоўкі да спецыяльнага паляўнічага экзамена.
Да 0,5 базавай велічыны павялічаны і памер платы за рэгістрацыю паляўнічых сабак.
Указам прадугледжана павелічэнне, у сярэднім у 3 разы, такс, што прымяняюцца для вызначэння шкоды, прычыненай навакольнаму асяроддзю ў выніку незаконнай здабычы дзікіх жывёл.
Забараняецца таксама нашэнне патронаў з куляй ці карцеччу пры паляванні на пушную дзікую жывёлу і пярнатых паляўнічых відаў.
Прыняцце рашэнняў аб прадастаўленні паляўнічых угоддзяў у арэнду перадаецца ад раённых Саветаў аблвыканкамам.
Дзеля папярэджання незаконнага паляўніцтва таксама будуць унесены адпаведныя змены ў Крымінальны кодэкс і Кодэкс аб адміністрацыйных правапарушэннях, якія прадугледжваюць санкцыі за набыццё, захаванне, перамяшчэнне, перавозку, раздзелку і перапрацоўку незаконна здабытай дзікай жывёлы.
Міхаіл АНДРОСЕНКА, пракурор раёна, саветнік юстыцыі.