Традыцыйнае спартыўнае свята “Спартландыя” на прызы трохразовага прызёра чэмпіянатаў свету, удзельніцы Алімпійскіх гульняў у спартыўнай хадзьце, у­раджэнкі Прыдруцкага краю Валянціны Цыбульскай адбылося ў Бялынічах у мінулую пятніцу.
У спаборніцтвах, якія праходзілі ў нашым райцэнтры ўжо ў 5 раз, прынялі ўдзел вучні СШ №2 Бялынічаў, Цяхцінскага комплексу дзіцячы сад-сярэдняя школа, а таксама дружыны СШ№2 г.п. Круглае і Цяцерынскай СШ Круглянскага раёна.
На ўрачыстым адкрыцці спартландыі выступіў старшыня Бялыніцкага райвыканкама Мікалай Кадаценка. Ён падкрэсліў, што ў нашай рэспубліцы вялікая ўвага надаецца здароваму ладу жыцця маладога пакалення. Бялыніцкі раён таму не выключэнне. Мікалай Міхайлавіч выказаў словы ўдзячнасці Валянціне Іванаўне за арганізацыю чарговага спартыўнага свята, а юным спартсменам пажадаў упартай і сумленнай барацьбы.
А спаборніцтвы і сапраўды былі ўпартымі і напружанымі.
Хлопчыкі і дзяўчынкі бегалі, скакалі ў мяхах, пераадольвалі штучныя перашкоды, спаборнічалі ў эстафетах з мячамі і скейтбордам… Адным словам, дэманстравалі не толькі хуткасць, але і лоўкасць, кемлівасць і спрытнасць. На працягу ўсёй гульні лідзіруючыя пазіцыі займалі бялыніцкія каманды.
У выніку, кубак заслужанага майстра спорту, ураджэнкі Бялынічаў Валянціны Цыбульскай 3-ці раз запар атрымала каманда Цяхцінскага КДССШ. На другую прыступку п’едэсталу гонару ўзняліся юныя спартсмены з СШ№2 Бялынічаў, трэцяе месца заваявалі вучні Цяцерынскай СШ.
Апроч таго, дзве родныя сястры, прызёры абласных спаборніцтваў па лёгкай атлетыцы Надзея і Дар’я Цапік за поспехі ў спорце атрымалі ў падарунак ад Валянціны Іванаўны спартыўную форму.
Валянціна Цыбульская засталася ў захапленні ад фізічнай падрыхтоўкі юных спартсменаў. Яна адзначыла, што ў многіх з іх ёсць вялікі спартыўны патэнцыял.
­