7 студзеня бялынічане традыцыйна адзначылі народнае свята Каляды. Яшчэ задоўга да пазначанага пачатку мерапрыемства на  пляцоўцы каля РЦК было шматлюдна. Бялынічане ішлі сюды сем'ямі. І хоць надвор'е не парадавала снегам ды маразамі, затое, жартавалі людзі, дажджу не было.
Свята адкрыла шэсце дружын Дзедаў Марозаў, якія з песнямі, скокамі прайшліся ад гарадской ёлкі да РЦК. Узначаліла гэты незвычайна маляўнічы парад калядная дружына райспажыўтаварыства як пераможца мінулагодняга аналагічнага творчага саперніцтва.
Неабходна адзначыць, што ўсе сёлетнія каманды Дзедаў Марозаў, а іх было дзесяць, падрыхтавалі цікавыя канцэртныя праграмы. Але спаборніцтва ёсць спаборніцтва, хоць журы на чале з намеснікам старшыні райвыканкама Надзеяй Серыкавай, было, думаецца, не проста і не лёгка вызначыць самых лепшых.
У выніку, дыпломам першай ступені і грашовай прэміяй быў узнагароджаны калектыў Бялыніцкай цэнтральнай раённай бальніцы. Другое месца падзялілі калектывы Жылкамгаса і ПМК-241, а трэцяе – каманды дапаможнай школы-інтэрната і прафесійнага ліцэя № 17.