Міністэрства сельскай гаспадаркі і харчавання Рэспублікі Беларусь у чарговы раз падвяло вынікі работы ў жывёлагадоўлі. За студзень-снежань 2013 года са 118 сельскагаспадарчых раёнаў рэспублікі Бялыніччына займае 17-ы радок у табелі спаборніцтва, што на  дзве прыступкі вышэй дасягнутага за першае паўгоддзе і на прыступку – вынікаў дзевяці месяцаў. Як бачна, за апошні квартал мінулага года жывёлаводы раёна ўзняліся на чарговую прыступку ў рэйтынгу эфектыўнасці вытворчасці прадукцыі. Нагадаем, што сярэдні надой малака ад каровы склаў 5518 кілаграмаў пры сярэднерэспубліканскім паказчыку – 4570. Менавіта па прадуктыўнасці дойнага статка Бялыніччына з’яўляецца лідарам у Магілёўскай вобласці. На дзевяць прыступак ніжэй у рэспубліканскім рэйтынгу размясціўся, напрыклад, Магілёўскі раён, на 11 – Горацкі, на 22 – Асіповіцкі, на 36 – Шклоўскі і 41 – Круглянскі. Замыкаюць спіс Крычаўскі і Краснапольскі раёны.

Прыведзены вышэй расклад зроблены на фоне агульнарэспубліканскага зніжэння прадуктыўнасці жывёлагадоўчай галіны. Калі ў нашым раёне гадавы надой малака ад каровы павялічыўся хоць на адзін кілаграм, то ў цэлым па краіне мінус дасягнуў 141 кілаграма.
Валавая вытворчасць малака на Бялыніччыне склала 46673 тоны, а мяса – 4702. Калі першы паказчык у аднапрацэнтным плюсе, то другі – у такім жа мінусе. Праўда, стратэгія пераходу галіны ад валавой вытворчасці да паспяховага фінансавага выніку нівеліруе прыведзеныя лічбы менавіта на грашовы прыбытак і рэнтабельнасць рэалізацыі прадукцыі. А тут, як слушна заўважаюць эканамісты, яшчэ непачаты край работы.
Васіль ДЗЕРАВЯШКА, «Зара над Друццю»