Адным з актуальных пытанняў парадку дня чарговага пасяджэння райвыканкама было наступнае: “Аб ходзе выканання мерапрыемстваў па навядзенні парадку на зямлі і добраўпарадкаванні г.п. Бялынічы і населеных пунктаў Бялыніцкага раёна ў 2014 годзе”. Праграма гэтых мерапрыемстваў была зацверджана рашэннем райвыканкама № 1-2 ад 3 студзеня бягучага года і яе атрымалі ўсе суб’екты гаспадарання.У ёй усе тэрыторыі і аб’екты распісаны і замацаваны з вызначэннем таго, што трэба зрабіць.
Адпаведныя мерапрыемствы распрацаваны і сельвыканкамамі.
Прамінула тры месяцы. Паўстала заканамернае пытанне: “Што зроблена за гэты час”? Тым больш, як адзначыў намеснік старшыні райвыканкама Андрэй Ерашэнка, умовы надвор’я як ніколі раней спрыялі актыўнасці правядзенню гэтай работы. І некаторыя арганізацыі прыступілі да выканання праграмы яшчэ са студзеня. Напрыклад, работнікі БУКП “Жылкамгас” правялі абрэзку і выдаленне аварыйных дрэў, імі выкананы работы па дэмантажы агароджы каля шматкватэрных жылых дамоў па вуліцы Дайнэка і аўтастанцыі, адрамантаваны прыпыначны пункт па вуліцы Я. Купалы, высякаўся хмызняк. У адпаведнасці з графікам і па меры неабходнасці праводзіцца грэйдзіраванне вуліц, у зонах адпачынку бялынічан устаноўлены малыя архітэктурныя формы... Паралельна наводзіцца парадак і на вытворчай тэрыторыі жылкамгаса.
-Актыўны ўдзел у рэалізацыі мерапрыемстваў па навядзенні парадку на зямлі прымаюць і працоўныя калектывы арганізацый усіх форм уласнасці, - адзначае Андрэй Ерашэнка. - На замацаваных за імі тэрыторыях падтрымліваецца санітарны парадак, праводзіцца бягучы рамонт фасадаў адміністрацыйных і вытворчых пабудоў, збудаванняў, агароджаў, іхнімі сіламі наводзіцца парадак на грамадзянскіх могілках.
Штотыднёва, па чацвяргах, на замацаваных і вытворчых тэрыторыях праводзяцца санітарныя дні, а спецыяльна ўтвораная раённая камісія кантралюе ход навядзення парадку, яго стан і падводзіць вынікі на нарадзе ў старшыні райвыканкама.
Намеснік старшыні райвыканкама адзначыў станоўчую работу ў гэтым накірунку калектыву ПМК № 241, які акрамя ажыццяўлення даведзеных праграмай мерапрыемстваў дадаткова добраўпарадкоўвае тэрыторыі каля ведамасных інтэрнатаў, размешчаных па вуліцах Мічурына і Калініна.
Адпаведныя службы праводзяць мэтанакіраваную работу з насельніцтвам па захаванні ім правілаў утрымання прыдомавых тэрыторый, упарадкаванні ўліку і скарачэння колькасці безгаспадарчых і трухлявых пабудоў. З пачатку бягучага года знесены 89 такіх дамоў.
Аднак работы па навядзенні парадку на зямлі, добраўпарадкаванні паселішчаў яшчэ непачаты край. Аб гэтым сведчаць і вынікі нагляднай дзейнасці. Спецыялісты райЦГіЭ за першы квартал бягучага года праверылі 232 тэрыторыі аб’ектаў гаспадарання, на 105 з іх былі выяўлены парушэнні санітарнага заканадаўства, за што да адміністрацыйнай адказнасці прыцягнуты 7 індывідуальных прадпрымальнікаў, 2 юрыдычныя і 3 фізічныя асобы, а таксама 39 пасадавых асоб. Агульная сума штрафных санкцый склала 38 мільёнаў 480 тысяч рублёў.
За гэты ж самы час раённая інспекцыя прыродных рэсурсаў і аховы навакольнага асяродку правяла 145 абследаванняў ферм, машынных двароў, зернесушыльных комплексаў, зон масавага адпачынку, міні-палігонаў для складзіравання цвёрдых бытавых адходаў, у ходзе чаго быў выяўлены 61 выпадак парушэнняў санітарнага і экалагічнага заканадаўства. Іншымі словамі, крыху больш як на  кожным другім аб’екце фіксаваўся непарадак. Прыродаахоўнікі за першы квартал гэтага года выпісалі і адрасавалі суб’ектам гаспадарання 60 прадпісанняў па ўхіленні выяўленых парушэнняў, склалі 10 адміністрацыйных пратаколаў на адказных пасадавых асоб на агульную штрафную суму ў 3 мільёны 445 тысяч рублёў.
Гаспадарам прыватных сядзіб наглядныя органы накіравалі 581 прадпісанне (абследавана 1 тысяча тэрыторый) па абавязковым навядзенні парадку і чысціні.
Намеснік старшыні райвыканкама Андрэй Ерашэнка канстатуе: не паспелі ў тэрмін, вызначаны праграмай мерапрыемстваў па навядзенні парадку і добраўпарадкаванні райцэнтра, выканаць адпаведныя работы ААТ “Аграсэрвіс”, “Бялыніцкае райаграпрамтэхзабеспячэнне” і некаторыя іншыя.  
Да шэрагу кіраўнікоў суб’ектаў гаспадарання, якія прамарудзілі з выкананнем запланаваных мерапрыемстваў па навядзенні парадку, прыняты меры матэрыяльнага і маральнага ўздзеяння.
Падсумоўваючы разгляд пытання “Аб ходзе выканання мерапрыемстваў па навядзенні парадку на зямлі і добраўпарадкаванні г.п. Бялынічы і населеных пунктаў Бялыніцкага раёна ў 2014 годзе”, старшыня райвыканкама Мікалай Кадаценка падкрэсліў:
-На гэты конт можна гаварыць многа і доўга. Калі ж сказаць коратка, то наводзім парадак выключна для сябе. Усе мы хочам жыць у прыгожым, утульным асяроддзі, але ж ніхто за нас яго не створыць. Таму трэба ўсім працаваць – пастаянна, па сілах і магчымасцях: толькі ў такім разе і будзе наведзены парадак. А нашым агульным дэвізам павінен стаць наступны выраз: “ Менш слоў – больш спраў”.