Урачыстасці, якія 9 мая адбыліся ў Бялынічах з нагоды 69-й гадавіны Перамогі савецкага народа ў Вялікай Айчыннай вайне, з’явіліся, па ўражаннях ветэранаў, не толькі самымі масавымі, але і найпрыгажэйшымі за ўсе ранейшыя святкаванні. Пасля таго, як арганізаваныя калоны дэманстрантаў, наперадзе якіх у легкавых аўтамабілях ехалі ўдзельнікі Вялікай Айчыннай вайны, увайшлі ў Ліпавы гай, адбыўся мітынг. З прывітальным словам да прысутных звярнуўся старшыня райвыканкама Мікалай Кадаценка. Як адзначыў прамоўца, Бялыніцкая зямля з першых дзён нямецкай акупацыі пачала ператварацца ў адзіны рубеж абароны, поле бою, палаючы партызанскі фронт. Больш за дзесяць тысяч бялынічан змагаліся на франтах Вялікай Айчыннай вайны, у партызанскіх атрадах. Сотні землякоў за гераізм і мужнасць былі ўзнагароджаны баявымі ардэнамі і медалямі. Назаўсёды ў нашай памяці застануцца імёны Герояў Савецкага Саюза — ураджэнца раёна Іосіфа Свідзінскага, Мікалая Кітаева, Барыса Хігрына, Асмана Касаева, Сяргея Церашкевіча, Леаніда Лорчанкі, якія звязалі свае жыцці і лёсы з Прыдруцкім краем. Ніхто не мае права забываць пра тых байцоў, якія загінулі на полі бою, у фашысцкіх сутарэннях, зніклі без весткі.
Мы радуемся таму, што краіна жыве пад мірным небам, у згодзе і ўзаемапаразуменні з суседзямі. Але змагацца за мір і парадак, выпраўляючы свае памылкі і вучачыся на памылках іншых, трэба пастаянна.
Асаблівыя словы падзякі за вялікі подзвіг, за Перамогу кіраўнік раёна выказаў на адрас ветэранаў. Мікалай Міхайлавіч пажадаў ім як мага далей заставацца ў страі, служыць для новых пакаленняў прыкладам мужнасці, стойкасці і сілы духа.
З вялікай увагай удзельнікі ўрачыстасці выслухалі палымяную прамову ветэрана вайны, партызана Віктара Аржанікава.
— Ад ста маіх аднагодкаў, удзельнікаў той вайны, дахаты вярнуліся толькі трое, — адзначыў Віктар Паўлавіч. — Я ўдзячны лёсу за тое, што ў надзвычай цяжкі для Айчыны час быў яе абаронцам, перажываў горыч няўдач і радасць Перамогі. Бязмежна рады, што жыву пад мірным небам, сустракаюся з моладдзю, каб расказваць праўду аб той вайне.
Эмацыянальным, насычаным глыбокім сэнсам атрымалася выступленне на мітынгу вучаніцы 10 класа СШ № 1 імя М. І. Пашкоўскага г.п. Бялынічы Вольгі Камінскай.
Кветкі да помніка на алеі Герояў усклалі старшыня райвыканкама Мікалай Кадаценка і старшыня раённага Савета дэпутатаў Аляксандр Асіпёнак, дэпутат абласнога Савета дэпутатаў Раіса Лычкоўская, бялынічане і госці райцэнтра. Да бюста Героя Савецкага Саюза, знакамітага ваеннага лётчыка Мікалая Кітаева, напрыклад, кветкі ўсклалі ўнук Мікалая Трафімавіча Генадзь Кітаеў з жонкай Валянцінай і дачкой Ганнай.
На імправізаваных салдацкіх прывалах і партызанскіх базах, якія з густам былі аформлены дызайнерамі БУКП «Жылкамгас», бялынічане судакрануліся з рэаліямі ваеннага часу, пакаштавалі салдацкую кашу... Прыцягвалі ўвагу прысутных гандлёвыя рады райста, прыгожа аформленыя гасцінныя падворкі сельсаветаў і ўстаноў культуры раёна.
Сіламі мастацкай самадзейнасці творчых калектываў і індывідуальных выканаўцаў быў дадзены вялікі святочны канцэрт. Асаблівае ўражанне, напрыклад, пакінула кампазіцыя «Жыві і памятай» у выкананні артыстаў БУКП «Жылкамгас».
Да позняга вечара на стадыёне ладзіліся спартыўныя спаборніцтвы самага рознага кшталту, дзейнічалі гульнёвыя пляцоўкі.
Васіль ДЗЕРАВЯШКА, «Зара над Друццю» Поделиться: