У рамках абласной акцыі «З любоўю да ветэранаў» у раённым мастацкім музеі імя В.К.Бялыніцкага-Бірулі была перададзена сімвалічная Кніга Памяці і Славы дэлегацыі Дрыбінскага раёна.
Абласная дабрачынная акцыя «З любоўю да ветэранаў», прысвечаная 70-годдзю вызвалення Беларусі ад нямецка-фашысцкіх захопнікаў, стартавала ў лютым у Магілёве.
Кніга Памяці заснавана спецыяльна для гэтай акцыі. Плануецца, што яна пабывае ва ўсіх кутках Магілёўшчыны. Пасля чаго выданне будзе перададзена абласному краязнаўчаму музею імя Е.Р. Раманава. Завершыцца марафон у канцы чэрвеня ў абласным цэнтры. Падчас святкавання Дня горада адбудзецца фінальнае мерапрыемства з удзелам ветэранаў, на якім будуць падведзены вынікі акцыі.
— Сёння мы рады перадаць, не пабаюся гэтага слова, свяшчэнную кнігу дэлегацыі з Дрыбіна, — адзначыла начальнік аддзела ідэалагічнай работы, культуры і па справах моладзі райвыканкама Ірына Фурсава. – У яе занесены самыя знамянальныя і самыя лепшыя мерапрыемствы Бялыніччыны, якія праходзяць у год 70-годдзя вызвалення Беларусі ад нямецка-фашысцкіх захопнікаў. Кожны раён мае магчымасць упісаць у Кнігу свой летапіс.  Таму мы з гонарам перадаём эстафету марафона Дрыбіну.
Падчас мерапрыемства таксама адбыўся рытуал прыняцця ў піянеры. Старшыня раённага савета ГА “Беларуская рэспубліканская піянерская арганізацыя” Таццяна Нізаўцова і ганаровыя госці мерапрыемства павязалі піянерскія гальштукі, сімвал прыналежнасці кожнага піянера справам сваёй арганізацыі, вучням СШ № 1 імя М.І.Пашкоўскага.
Наталля ЗУБРЫЦКАЯ, «Зара над Друццю»