З 28 мая па 1 чэрвеня ў Клімавічах прайшоў 14 Міжнародны фестываль дзіцячай творчасці «Залатая пчолка». У гэтым годзе ў конкурснай праграме фестывалю было заяўлена каля 700 удзельнікаў з 11 краін. Упершыню на сцэне ў Клімавічах выступілі госці з Узбекістана і Туркменістана. Мерапрыемства прайшло пад дэвізам Года гасціннасці і святкавання 70-годдзя вызвалення Рэспублікі Беларусь ад нямецка-фашысцкіх захопнікаў.
Юныя таленты Прыдруцкага краю таксама не засталіся ў баку і дастаткова паспяхова прадэманстравалі свае здольнасці. Так, выхаванцы Бялыніцкай дзіцячай школы мастацтваў і мастацкіх рамёстваў былі адзначаны дыпломамі. Яніна Аўсейкава, выхаванка 5 класа выяўленчага мастацтва ў намінацыі «Дэкаратыўна-прыкладное мастацтва» была ўзнагароджана Дыпломам І ступені, настаўнік — Лілія Войлакава. Дыплом удзельніка конкурсу «Залатая пчолка» у намінацыі «Выяўленчае мастацтва» атрымала вучаніца 4 класа дэкаратыўна-прыкладнога мастацтва аграгарадка Цяхцін Анастасія Юшкоўская. Яе падрыхтавала Наталля Кутавая.