12 чэрвеня 126 маладых грамадзян нашага раёна развіталіся са школай. Пад барабанны бой яны прайшлі па цэнтральнай вуліцы Бялыніч: усмешлівыя дзяўчаты ў шыкоўных сукенках і хлопцы ў элегантных касцюмах пакінулі сцены родных школ і накіраваліся да новых гарызонтаў і запаветных мараў.
Атмасфера свята ў гэты дзень вілася над рабятамі з самай раніцы, а ў палове восьмага вечара яны сустрэліся ў вялікай зале РЦК, каб пажадаць адзін аднаму шчаслівага шляху, яшчэ раз выказаць словы падзякі сваім настаўнікам і бацькам, атрымаць заслужаныя ўзнагароды за дасягнутыя поспехі.
– Гледзячы на нашу моладзь, мяне перапаўняе пачуццё гонару. Віншую вас з гэтай важнай падзеяй у вашым жыцці. Няхай яно складзецца ўдачна, а справы будуць паспяховымі. Смела ідзіце да вызначанай мэты і ў вас усё атрымаецца! У добры шлях! – сказала, звяртаючыся са словамі наказу да выпускнікоў, намеснік старшыні райвыканкама Надзея Серыкава. Яна ўручыла залатыя медалі лепшым выпускнікам. У гэтым годзе атэстаты асобага ўзору і залатыя медалі атрымалі дзесяць выпускнікоў школ раёна.
Пасля гэтага вечарына працягнулася для выпускнікоў сельскіх школ у раённым Цэнтры культуры. Пад звукі музыкі выпускнікі, настаўнікі, бацькі і госці накіраваліся ў святочную залу. Свае школьныя балі прайшлі таксама ў СШ №1 і СШ №2.
Андрэй СУПІТАЛЁЎ, “Зара над Друццю”