На чарговым пасяджэнні райвыканкама, якое адбылося 3 кастрычніка, было разгледжана больш за дваццаць пытанняў, унесеных у парадак дня яго правядзення. У тым ліку “Аб прыватызацыі жылых памяшканняў дзяржаўнага жыллёвага фонду”, “Аб уключэнні грамадзян у спіс на атрыманне льготных крэдытаў для газіфікацыі эксплуатуемага жыллёвага фонду”, “Аб прадастаўленні маладым і мнагадзетным сем’ям фінансавай падтрымкі дзяржавы”, “Аб выдачы пасведчання мнагадзетнай сям’і”, “Аб прысуджэнні ў 2014/2015 навучальным годзе стыпендыі імя Героя Савецкага Саюза М. Т. Кітаева вучням, якія дабіліся высокіх паказчыкаў у вучобе і грамадскай дзейнасці” і іншыя.
Члены раённага выканаўчага камітэта заслухалі інфармацыю намесніка старшыні райвыканкама Дзмітрыя Давыдава “Аб ходзе выканання рашэння Бялыніцкага райвыканкама ад 5 верасня 2014 г. № 19-14 «Аб гатоўнасці аб'ектаў народнай гаспадаркі раёна да работы ў асенне-зімовы перыяд 2014 – 2015 гадоў».
Дзмітрый Давыдаў адзначыў, што ў цэлым па раёне перадзімовыя падрыхтоўчыя работы завершаны. Па стане на 26 верасня ў раённай энергаінспекцыі былі зарэгістраваныя пашпарты гатоўнасці на ўсе 52 цеплакрыніцы і 72 спажыўцоў энергіі.
Разам з тым некаторыя прадпрыемствы яшчэ не завяршылі ў поўным аб’ёме выкананне даведзеных мерапрыемстваў, накіраваных на забеспячэнне належнай работы ў халодную пару года. Напрыклад, на пасяджэнні райвыканкама прызнана недастатковай работа кіраўніцтва філіяла КУП “Магілёўаблдарбуд” – ДРБУ № 170 па нарыхтоўцы пясчана-солевай сумесі для ўтрымання аўтамабільных дарог, раёна электрычных сетак – па правядзенні капітальнага ромаонту КТП, ПЛ-10 кВ, 0,4 кВ і ЗТП-10/04.
Прымаючы пад увагу непрацяглы перыяд работы на пасадзе начальніка ДРБУ № 170 Алега Філіпава, райвыканкам указаў яму на недапушчальнасць парушэння тэрмінаў нарыхтоўкі пясчана-солевай сумесі і абавязаў завяршыць яе назапашанне ў вызначаным аб’ёме да 1 лістапада бягучага года.   
Начальнік раёна электрычных сетак Уладзімір Адамовіч ва ўстаноўленым парадку будзе прыцягнуты да дысцыплінарнай адказнасці. Завяршыць капітальны рамонт КТП, ПЛ-10 кВ, 0,4 кВ і ЗТП-10/04 работнікі РЭСа абавязаны да 1 снежня 2014 года.
Рашэннем райвыканкама прадпісана ўсім кіраўнікам прадпрыемстваў прыняць меры па забеспячэнні гатоўнасці тэхнікі, а дарожных арганізацый – стварыць двухтыднёвы непаніжальны запас ГЗМ для выканання неадкладных работ па ліквідацыі снежнага покрыва. Кіраўніку філіяла “Бялыніцкі райпалівазбыт” КАУВП “Аблпаліва” А. Янкоўскаму і дырэктару ДЛГУ “Бялыніцкі лясгас” Ю. Заблоцкаму пастаўлены канкрэтныя задачы па далейшым забеспячэнні насельніцтва дравамі.
Міхась КАРПЕЧАНКА, “Зара над Друццю”