Актывісты БРСМ холдынга “Магілёўская малочная кампанія “Бабуліна крынка” арганізавалі міні-суботнік на тэрыторыі мемарыяльнага комплекса “Стэфанова”.
– Гэта ідэя цалкам належыць нашай моладзі, – распавяла пра акцыю намеснік дырэктара па ідэалогіі і быту холдынга Святлана Сташэўская. – У арганізацыі БРСМ “Бабулінай крынкі” ёсць падраздзяленне “Маладзёжная брыгада за чысціню гарадоў і сёлаў”. Не так даўно яго актывісты добраўпарадкоўвалі адзін з помнікаў Вялікай Айчыннай вайны ў Магілёве, што вельмі ўражыла іх. Нашы хлопцы і дзяўчаты прапанавалі наведаць помнікі і мемарыяльныя комплексы на Магілёўшчыне, каб не проста навесці чысціню, але яшчэ і паглыбіць свае веды па гісторыі роднага краю.
Першым аб’ектам у вобласці, на якім пабывалі актывісты, стаў мемарыяльны комплекс “Стэфанова”, дзе падчас Вялікай Айчыннай вайны немцы знішчылі цэлую вёску мірных жыхароў.
З мётламі і граблямі сюды прыехалі прадстаўнікі Магілёўскага прадпрыемства Святлана Сташэўская, Вольга Курэпіна, Кірыла Страх, Марына Пудзянкова, Наталля Рагачова і Дзяніс Ізох. Таксама ў суботніку прынялі ўдзел Уладзіслаў Харламаў і Аляксандр Кунцэвіч, якія працуюць на Бялыніцкім філіяле “Бабулінай крынкі”. Самі актывісты так ахарактарызавалі акцыю.
Кірыла Страх, інжынер:
– Навесці парадак на мемарыяльным комплексе – меншае, што мы можам зрабіць для тых людзей, у гонар якіх ён тут зроблены. Гэта асабісты патрыятычны ўклад кожнага з нас. Так мы паказваем, што нам не ўсё роўна. Да таго ж, гэта не такая вялікая праца – падмесці апалае лісце.
Вольга Курэпіна, праграміст:
– Тое, што тут адбылося падчас вайны, жахліва, але зараз нічога не выправіш. Застаецца толькі прыязджаць, даглядадаць помнікі і не забывацца на нашу гісторыю, каб такое ніколі не паўтарылася.
Анастасія МАКЕЕВА, “Зара над Друццю”