Падведзены вынікі Х рэспубліканскага фестывалю-конкурсу дзіцячых сродкаў масавай інфармацыі “Свежы вецер”. Праводзіўся ён па ініцыятыве Міністэрства адукацыі Рэспублікі Беларусь і Нацыянальнага дзіцячага выхаваўча-аздараўленчага цэнтра “Зубраня” дзеля эфектыўнага фарміравання інфармацыйнай культуры школьнікаў і стымулявання актыўнай дзейнасці юных журналістаў па стварэнні актуальных, адпавядаючых сучасным патрабаванням матэрыялаў для школьных газет, радыё- і відэапраграм.

Удзел у творчым спаборніцтве прынялі і выхаванцы шматпрофільнага цэнтра “Ветразь” г.п. Бялынічы, навучэнкі аб’яднання па інтарэсах “Юны журналіст”, якое дзейнічае на базе сярэдняй школы №2, - Аліна Бародзька і Ганна Лапо. Кіраўнік – педагог дадатковай адукацыі Дзяніс Руцкі.

Дзяўчаты прадставілі на конкурс радыёпраграмму «Our Life». Журы ацаніла творчы падыход і арыгінальнасць работы і ўзнагародзіла яе аўтараў дыпломам пераможцы ў намінацыях “Лепшая радыёпраграмма” і “Лепшае музычнае афармленне”. Апроч таго, таленавітыя бялынічанкі атрымалі ў падарунак пуцёўку на адпачынак у НДЦ “Зубраня”. З мэтай павелічэння інфармаваннасці маладога пакалення была праведзена экскурсія на Белтэлерадыёкампанію, арганізаваны майстар-класы са знакамітымі вядучымі і многае іншае, што дапаможа нашым дзяўчатам больш даведацца пра асаблівасці мультымедыйнага і журналістскага жыцця.