У рамках рэспубліканскай дабрачыннай акцыі «Нашы дзеці» на навагодні ранішнік у дапаможную школу-інтэрнат для дзяцей-сірот і дзяцей, якія засталіся без апекі бацькоў, з падарункамі і сардэчнымі пажаданнямі завіталі намеснік старшыні аблвыканкама Віктар Некрашэвіч, старшыня раённага Савета дэпутатаў Аляксандр Асіпёнак, намеснік старшыні райвыканкама Алена Котасава, намеснік гендырэктара ДА “Белдругмет” Аляксандр Анчук, старшыня прафсаюзнага камітэта ААТ “Белдругчармет” Сяргей Кадушкін і дырэктар ВУП “Магілёўдругчармет” Міхаіл Бондараў.
Госці павіншавалі вучняў і педагогаў з Новым годам і Калядамі, а намеснік дырэктара ўстановы Людміла Койда падзякавала ім за падарункі: цукеркі, пыласос, камп’ютэр і іншую складана-бытавую тэхніку. «Вельмі прыемна зноў бачыць людзей, якія ўжо не раз праяўлялі сваю неабыякавасць да дзяцей, што жывуць і вучацца ў нас, – адзначыла яна. – І гэта сапраўды так, бо падчас традыцыйнай навагодняй акцыі “Нашы дзеці” напрацягу некалькіх гадоў спонсары наведваюць нас, дораць салодкія падарункі дзецям, абсталяванне школе-інтэрнату».
Па-сапраўднаму светлыя, шчырыя ўсмешкі з’явіліся на тварах і дзяцей, і дарослых, калі ў святочна прыбраную залу ўвайшлі “пад ручку” Лясун з Кікімарай. Дзеці хутка раскрылі іх злачынны план: не ўдалося лясным жыхарам выкрасці падарункі. А самы чаканы госць тым часам спяшаўся на свята са сваёй унучкай Снягурачкай.­

­