Днямі пасля капітальнага рамонту ў ЦРБ адкрылася аддзяленне хуткай медыцынскай дапамогі.
Гэта ўжо другое памяшканне ЦРБ, якое за апошнія 2 тыдні атрымала новае жыццё. Нагадаем, што напрыканцы лютага запрацаваў адноўлены кабінет урача-афтальмолага.
На аднаўленне аддзялення было выдаткавана звыш 200 мільёнаў рублёў пазабюджэтных сродкаў.
У новым памяшканні поўнасцю адноўлена ўнутраная аддзелка, абсталяваны дыспетчарская, “заправачны” пакой, у якім захоўваецца неабходны медакаментозны запас, а таксама чамаданы-ўкладкі, якія ўключаюць медыцынскія наборы для цяжарных, медпрыналежнасці пры масавых траўмах, атручваннях хімічнымі рэчвамі і набор неабходных матэрыялаў пры ўзнікненні асабліва небяспечных інфекцый. Аднавіліся пакоі для адпачынку і харчавання персаналу службы хуткай дапамогі. З’явілася і душавая кабіна, якой дасюль не было.
Галоўны ўрач ЦРБ Віктар Пянькоўскі ў якасці падарунка ўручыў работнікам аддзялення хуткай дапамогі кухонныя прыналежнасці і два лічбавыя дыктафоны. Апошнія, па словах Віктара Канстанцінавіча, дазволяць павысіць эфектыўнасць сістэмы аховы працы, бяспеку медыкаў і, разам з тым, павялічыць іх адказнасць за сваю працу.

­
Вольга НАБОКАВА, «Зара над Друццю»