Праваслаўныя вернікі Магілёўшчыны па блаславенні епіскапа Магілёўскага і Мсціслаўскага Сафронія зрабілі традыцыйны двухдзённы хрэсны ход з іконай Маці Божай Бялыніцкай з Магілёва ў Бялынічы.
Гэты цудатворны абраз з’яўляецца адным з самых пашаноўных і галоўных для беларускіх хрысціян, яго лічаць “беларускай Чанстаховай”.
 “Возбранной Воеводе и предивной Заступнице рода христианскаго, благоизволившей от святыя Своея Белыничския иконы изливати нам струи благодатных исцелений, похвальная восписуем Ти раби Твои, Богородице. Ты же, яко благая заступница чтущих Тя христиан страны нашея, от всяких нас бед свободи да зовем Ти: Радуйся, Богородице Дево, от Белыничския иконы чудеса нам источающая” (Кондак 1, Акафист Пресвятей Богородице в честь иконы Ея Белыничския).
Пачаўся хрэсны ход раніцай 24 красавіка пасля мал­ебну ў магілёўскім кафедральным саборы Трох Свяціцеляў. Шлях паломнікаў у сорак блаславеных кіламетраў пад мацярынскім пакровам Прасвятой Багародзіцы пралягаў уздоўж трасы М-4 праз Казіміраўку, дзе ў царкве Божай Маці Усецарыцы таксама адбыўся малебен, аграгарадок Вішоў з божаслужэннем у храме Святых апосталаў Пятра і Паўла.
Да царквы ў гонар іконы Маці Божай Бялыніцкай хрэсны ход урачыста падышоў каля 21 гадзіны, калі ў ім завяршалася вячэрняе богаслужэнне.
Назаўтра ў храме адбылася святочная Божая літургія архіерэйскім чынам, якую ўзначаліў уладыка Сафроній.


­Міхась КАРПЕЧАНКА, “Зара над Друццю”­