7-10 мая на базе ФАКу “Друць” прайшоў традыцыйны Міжнародны турнір па гандболе памяці Героя Савецкага Саюза Асмана Касаева і з нагоды 70-годдзя Перамогі ў Вялікай Айчыннай вайне.
У ім прынялі ўдзел шэсць гандбольных каманд з розных рэгіёнаў Беларусі і Расіі: зборныя Віцебскай і Магілёўскай абласцей, каманды Рэспубліканскага вучылішча алімпійскага рэзерву і Рэспубліканскага цэнтра алімпійскай падрыхтоўкі па гандболе (абедзве – г. Мінск), зборная Карачаева-Чаркескай рэспублікі і дружына мясцовай ДЮСШ.
На цэрымоніі адкрыцця ўдзельнікаў спаборніцтваў і гледачоў віталі намеснік старшыні райвыканкама Надзея Серыкава, начальнік аддзела адукацыі, спорту і турызму райвыканкама Андрэй Ганчук, галоўны спецыяліст аддзела ідэалагічнай работы, культуры і па справах моладзі райвыканкама Сяргей Усаў.
І вось пачаўся гандбол. У дэбютнай гульні мераліся сіламі зборная Карачаева-Чаркесіі і каманда вучылішча алімпійскага рэзерву. Мінчанкі з першых хвілін захапілі ініцыятыву і заваявалі ўпэўненую перамогу з лікам 25:17. Абедзве каманды задалі­ гульні высокі тэмп, паказалі прыклад упартай барацьбы, якая не сціхала на гандбольнай пляцоўцы на працягу ўсіх трох дзён турніру. Балельшчыкі, што прыйшлі падтрымаць каманды, убачылі сапраўдны гандбол: хуткі, напорысты, з мноствам небяспечных момантаў і галоў.
Па выніках турніру першае месца занялі гандбалісткі з Віцебшчыны, другой стала зборная Магілёўскай вобласці, касцяк якой сфарміравалі выхаванкі Бялыніцкай ДЮСШ. Замкнула тройку прызёраў гандбольная дружына з Карачаева-Чаркесіі. Каманды-прызёры былі ўзнагароджаны кубкамі, медалямі і дыпломамі.Сярод іншых лепшымі ў асабістых намінацыях прызнаны і выхаванкі Бялыніцкай ДЮСШ Аліна Мураўёва (лепшая левая вуглавая), Юлія Зайцава (лепшая правая вуглавая) і Анастасія Панчанка (лепшая правая паўсярэдняя).

­
­­
Генеральным спонсарам турніру выступіў СВК “Калгас “Радзіма”. Фінансавую падтрымку ў яго арганізацыі таксама аказалі ААТ “Новая Друць” і райспажыўтаварыства.
Андрэй СУПІТАЛЁЎ, «Зара над Друццю»