Месца правядзення семінара выбрана не выпадкова, бо па выніках мінулага года Бялыніцкае ААТ “Бытпаслугі” і комплексны прыёмны пункт Клічаўскага РКБА сталі лепшымі ў рэспубліцы ў сферы бытавога абслугоўвання.
Удзельнікі семінара наведалі шэраг аб’ектаў бытпаслуг Магілёва, а потым завіталі на Бялыніччыну, дзе дырэктар ААТ “Бытпаслугі” Святлана Галанава распавяла аб якасці бытавых паслуг, што аказваюцца насельніцтву, і выкананні сацыяльных стандартаў у гэтай галіне, падзялілася вопытам з калегамі.
Госці наведалі цырульню таварыства, якая пасля рамонту аднавіла сваю працу ў 2011 годзе, пазнаёміліся з дзейнасцю цэха дрэваапрацоўкі.
Валянцін Чаканаў звярнуў ўвагу “бытавікоў” на неабходнасць “па магчымасці ствараць цэхі па апрацоўцы драўніны. На сёння гэты від паслуг найбольш запатрабаваны”.
Як адзначыла Святлана Галанава, за апошнія 7 гадоў таварыству ўдалося ўкамплектаваць кадрамі ўсе комплексна-прыёмныя пункты, аднавіць работу швейнага цэху, адрамантаваць цырульню.
- А самае важнае наша дасягненне – гэта адкрыццё ўчастка дрэваапрацоўкі, -- кажа Святлана Барысаўна. – На сёння мы можам выканаць любы заказ кліента па вырабе піламатэрыялаў. Працуем, як кажуць, пад заказ, а не на склад. Імкнёмся знаходзіць буйных заказчыкаў. Насельніцтву таксама не адмаўляем. Тым больш, што і цэны ў нас не “кусаюцца”. Кошт на прадукцыю не паднімалі амаль два гады.
Шмат пытанняў удзельнікі семінара задавалі Святлане Галанавай. У яе адказах адчувалася, што кіраўнік яна дасведчаны, прадпрыемства сваё ведае, што называецца, ад “А” да “Я”.
Валянцін Чаканаў адзначыў, што бытавое абслугоўванне насельніцтва ў Бялыніцкім раёне арганізавана належным чынам, аб чым сведчыць першае месца ў рэспубліканскім спаборніцтве па выніках мінулага года. “У цэлым жа па рэспубліцы дзейнасць бытавога абслугоўвання можна ацаніць станоўча. Аднак падтрымка і дапамога з боку раённых і абласных выканаўчых камітэтаў будзе не лішняй. Трэба развіваць перспектыўныя віды паслуг, такія, напрыклад, як у Бялынічах. А галоўнае — не баяцца не справіцца з задачай. Я рады, што ў краіне ёсць такое прадпрыемства, як Бялыніцкае ААТ “Бытпаслугі”. Гісторыя апошніх 7 гадоў прадпрыемства – гэта яскравы прыклад, як трэба працаваць, каб быць лепшымі.”
Сваю работу семінар завершыў на Кругляншчыне, дзе адбылося выніковае пленарнае пасяджэнне.

Наталля КАПЫЛОВА, “Зара над Друццю”