Абласны конкурс прафесійнага майстэрства сярод вальшчыкаў лесу “Лесаруб-2015” прайшоў на базе Клімавіцкага лясгаса. Удзел у ім прынялі дружыны 13 лесагаспадарчых устаноў Магілёўшчыны. Каманду нашага лясгаса прадставілі работнікі Кіраўскага лясніцтва Андрэй Бародзіч, Сяргей Бародзіч, Валерый Сідаровіч, Уладзімір Каўкоў, Максім Бародзіч і Аляксандр Грыбайла.
Сваё прафесійнае майстэрства вальшчыкі дэманстравалі ў практыкаваннях па мантажы ланцуга, абразанні сукоў, валцы дрэў, камбінаванай і дакладнай распілоўцы.
Вальшчык Кіраўскага лясніцтва Андрэй Бародзіч узняўся на п’едэстал гонару ва ўсіх практыкаваннях, у тым ліку ў трох першых ён прызнаны лепшым. У выніку Андрэй Мікалаевіч атрымаў і заслужанае першае месца ў індывідуальным заліку спаборніцтваў, набраўшы 1628 балаў з магчымых 1630.
Акрамя таго вадзіцель аўтамабіля па адвозцы леса Уладзімір Каўкоў стаў трэцім у спаборніцтвах сярод аператараў гідраманіпулятараў. Дасягненні названых удзельнікаў спаборніцтва прадвызначылі лёс і ўсёй нашай каманды. У агульнакамандным заліку каманда нашага лясгаса прызнана лепшай з лепшых.
Вольга НАБОКАВА, «Зара над Друццю»