Дзень ведаў – гэта сапраўднае свята ўсіх пакаленняў. Жыццёвы шлях кожнага чалавека вызначаецца менавіта ў школе, любімымі настаўнікамі, вучэбнай дысцыплінай. Па вялікім рахунку, усе мы – са школы.
1 верасня ўрачыстыя лінейкі з нагоды пачатку чарговага навучальнага года адбыліся ва ўсіх установах адукацыі раёна. На адной з іх, якая праходзіла ў СШ № 2, пабываў і карэспандэнт “Зары над Друццю”.
 Дырэктар установы Уладзімір КОТАЎ адзначыў уклад калектываў шэфскіх арганізацый, а таксама работнікаў установы ў падрыхтоўку школы і класаў да новага навучальнага года.
-Наша школа, - сказаў ён, - у новы навучальны год уступае ў абноўленым выглядзе.
Старшыня райвыканкама Мікалай КАДАЦЕНКА пажадаў вучням і настаўнікам поспехаў і плёну, а першакласнікам – цікавасці да вучобы, дапытлівасці, настойлівасці на шляху авалодання ведамі.
Кіраўнік раёна ўручыў калектыву школы падарунак – прынтар. З падарункамі завіталі на лінейку і прадстаўнікі шэфскіх арганізацый СШ № 2: ПМК № 241, лясгаса, аўтапарка № 7. Прадстаўнік галоўнага ўпраўлення Нацыянальнага банка Беларусі па Магілёўскай вобласці Алена МАНЬКО ўручыла сертыфікат мнагадзетнай маці Святлане СІДАРОВІЧ, сын якой, Саша, пайшоў у першы клас СШ №2.
Першы Дзень ведаў для кожнага з нас не толькі незабыўнае свята, але і пачатак нялёгкай дарогі ў будучыню, у цікавае жыццё, напоўненае адкрыццямі, радасцю пазнання, сяброўствам.  
Па заканчэнні школьных лінеек ва ўсіх класах прайшоў першы ўрок на тэму: “На цябе, наша моладзь, надзея!”.
Дарэчы, сёлета за парты школ раёна селі 2026 вучняў, з іх – 234 першакласнікі.
Міхась Карпечанка, “Зара над Друццю”