Паводле інфармацыі спецыялістаў Рэспубліканскага цэнтра па гідраметэаралогіі, кантролі радыеактыўнага забруджвання і маніторынгу навакольнага асяроддзя Міністэрства прыроды, у суботу ў паўднёва-ўсходнія рэгіёны краіны прыходзіць чарговы цыклон, які перамяшчаецца з Венгерскай нізіны на паўночна-заходнія рэгіёны Расіі.
У сувязі з гэтым чакаецца істотнае пагаршэнне надвор'я: на большай частцы Беларусі пройдзе моцны мокры снег, мяцеліца, наліпанне мокрага снегу і галалёдныя з'явы, на дарогах магчымы снежныя заносы. Тэмпература паветра днём у гэтых рэгіёнах наблізіцца да нулявой адзнакі, а на астатняй тэрыторыі Беларусі будзе пераважаць марознае надвор'е.
Сіноптыкі папярэджваюць, што пасля гэтага да канца другой дэкады студзеня захаваецца зімовы характар надвор'я, месцамі не абыдзецца без кароткачасовага снегу.
У Беларусі, як і на Бялыніччыне, зроблена ўсё неабходнае для функцыянавання ўстаноў аховы здароўя, адукацыі, культуры, гандлю, дзейнічае транспарт, у тым ліку і на дарогах камунальнага значэння, арганізацыі спажыўкааперацыі дастаўляюць прадукты ва ўсе населеныя пункты.
У сувязі з чарговым пагаршэннем надвор’я заклікаем усіх жыхароў раёна праявіць разуменне і асабістую адказнасць. Без пільнай неабходнасці ў непагадзь не выходзьце на вуліцу. А калі ўзнікла такая патрэба, цёпла апраніцеся, папярэдзьце аб гэтым членаў сваёй сям’і альбо вазьміце спадарожніка. Не забудзьцеся і на мабільны тэлефон.
Калі сціхне непагадзь, па магчымасці акажыце дапамогу работнікам камунальнай службы па ачыстцы ад снегу падыходаў да пад’ездаў, дамоў, міждворавых тэрыторый, дарог, парковак асабістага транспарту.
Мы разам павінны зрабіць усё магчымае, каб у чарговым цыклоне не пацярпелі людзі.
  Раённы выканаўчы камітэт. Раённы Савет дэпутатаў.