Рэспубліканская грамадска-патрыятычная акцыя “Тут жыве ветэран Вялікай Айчыннай вайны. Дзякуй за Перамогу!”, ініцыятарам якой з’яўляецца ГА “Беларускі фонд міру”, стартавала ў нашым раёне.
Сутнасць яе заключаецца ў тым, што на дамы і дзверы кватэр, у якіх пражываюць ветэраны Вялікай Айчыннай вайны, прымацоўваюцца таблічкі з сугучным назве акцыі надпісам і відарысам ордэна Айчыннай вайны.
У аўторак першыя таблічкі з’явіліся на дзвярах ветэранаў, якія пражываюць у доме-інтэрнаце для састарэлых і інвалідаў. Аддаць тым самым даніну павагі і падзякаваць за перамогу ў Вялікай Айчыннай вайне да Кацярыны ЧЫЖЫК і Марыі ВАНЬКУРАВАЙ завіталі намеснік старшыні райвыканкама Андрэй ГАНЧУК, старшыня раённай арганізацыі ГА “Беларускі фонд міру” Надзея СЕРЫКАВА, старшыня раённага аб’яднання прафсаюзаў, якія ўваходзяць у Федэрацыю прафсаюзаў Беларусі, Святлана ПАТАПЧЫК, першы сакратар райкама ГА “БРСМ” Святлана СЕЛЬВАНКОВА і інш.
- Адна з асноўных задач акцыі – фарміраванне ў падрастаючага пакалення грамадзянска-патрыятычных і маральных каштоўнасцяў. І гэта нездарма, -- падкрэсліў намеснік старшыні райвыканкама Андрэй ГАНЧУК. – Сведкаў той вайны з кожным годам застаецца ўсё менш. Таму для моладзі пачуць аб тых страшных падзеях менавіта з вуснаў ветэранаў – навучальна і каштоўна.
Да 9 мая адпаведныя таблічкі будуць размешчаны на дамах усіх 23 ветэранаў Вялікай Айчыннай вайны, якія пражываюць на Бялыніччыне.

Вікторыя ДАБРАЛОВІЧ.