26 января
“Сіла духу, згуртаванасці і адзінства”
![](/image.php?image=%2Fdata%2Fregion746.jpg&width=200&height=185&cropratio=200%3A185)
Пад такой назвай у малай зале кінатэатра “Зорка” прайшло мерапрыемства, ініцыятарам якога выступіла раённае аб’яднанне арганізацый прафсаюзаў, якія ўваходзяць у ФПБ. Удзел у ім прынялі актывісты прафсаюзнага руху Бялыніччыны, прадстаўнікі сацыяльных партнёраў, ветэраны працы, моладзь.
Трэба нагадаць, што сёлета ў лік лаўрэатаў прэміі Прэзідэнта Рэспублікі Беларусь “За духоўнае адраджэнне” ўвайшла і Федэрацыя прафсаюзаў Беларусі, якая была адзначана за важкі ўклад у патрыятычнае выхаванне грамадзян краіны, у тым ліку дзяцей, вучняў і працоўнай моладзі. Гэтай працы надае вялікую ўвагу і раённае аб’яднанне прафсаюзаў, актывісты якога прымаюць удзел у разнастайных патрыятычных акцыях як агульнарэспубліканскага, так і рэгіянальнага маштабаў.
Раённае аб’яднанне арганізацый прафсаюзаў, якія ўваходзяць у ФПБ, цесна і плённа супрацоўнічае з усімі прадпрыемствамі, арганізацыямі і ўстановамі Бялыніччыны на ніве патрыятычнага і духоўнага выхавання грамадзян. На гэты момант пастаянна звяртала ўвагу прысутных вядучая сустрэчы бібліятэкар Алена ГРЫБАЙЛАВА, дапаўняючы сваім аповедам відэаролік: на кінаэкране адлюстроўваліся найбольш значныя падзеі прафсаюзнага жыцця раёна.
Прыемным момантам мерапрыемства стала ўзнагароджванне. За добрасумленную працу па патрыятычным выхаванні грамадзян і актыўны ўдзел у прафсаюзным руху граматы і каштоўныя падарункі раённага аб’яднання арганізацый прафсаюзаў, якія ўваходзяць у ФПБ, ад старшыні яго Святланы ПАТАПЧЫК атрымалі дырэктар дзіцяча-юнацкай спартыўнай школы Віктар ПАДОЛЬСКІ, кіраўнік аб’яднання “Спадчына” Цяхцінскага ВПК ДС ДШ Лілія ШАКУРА, старшыня Запольскага сельсавета Марыя ЛІСТАПАДАВА.
Граматамі за значны ўклад у патрыятычнае і грамадзянскае выхаванне насельніцтва і падтрымку прафсаюзнага руху раёна былі адзначаны ДУА “Бялыніцкая цэнтралізаваная бібліятэчная сетка” і рэдакцыя раённай газеты “Зара над Друццю”.
Усе адзначаныя асобы і ўстановы праводзяць актыўную работу па развіцці грамадзянскай самасвядомасці і патрыятызму, абуджаюць інтарэс да цікавай гісторыі, багатай культуры і адметных традыцый Бялыніччыны і ўсёй краіны ў цэлым. Гэта і рознабаковая дзейнасць школы Міру і юных міратворцаў Цяхцінскай школы, і выхаванне павагі да баявых традыцый нашых бацькоў і дзядоў, сустрэчы моладзі з воінамі-інтэрнацыяналістамі, якія праводзіць райарганізацыя РГА “Беларускі саюз ветэранаў вайны ў Афганістане” пад старшынствам Віктара Падольскага.
Значная праца вядзецца па рэстаўрацыі і добраўпарадкаванні помнікаў і месцаў пахавання воінаў Вялікай Айчыннай вайны. Напрыклад, у пазамінулым годзе на тэрыторыі Запольскага сельскага Савета на гэту справу было зрасходавана 100 млн недэнамінаваных рублёў, замест старых устаноўлены 9 новых памятных знакаў.
Творча і з адказнасцю да справы патрыятычнага выхавання падрастаючага пакалення падыходзяць і супрацоўнікі бібліятэчнай сеткі. Напрыклад, цэнтральная раённая бібліятэка ў 2015 годзе заняла першае месца ў абласным аглядзе-конкурсе на лепшую пастаноўку работы па ваенна-патрыятычным выхаванні “Жывая памяць пакаленняў”.
Таксама рэдакцыя раённай газеты не аднойчы атрымлівала самую высокую ацэнку сваёй дзейнасці за асвятленне на старонках выдання значных вех жыцця Бялыніччыны, слаўных падзей нашага мінулага.
А ўсё разам, як сказала ў кароткай прамове Лілія Шакура, гэта агульная праца па патрыятычным выхаванні грамадзян заключаецца, па вялікім рахунку, у тым, каб рабіць добрыя справы на карысць грамадства і краіны.
Трэба падкрэсліць, што мерапрыемства прайшло ў цёплай, па-сапраўднаму сямейнай абстаноўцы. І, як адзначыла Святлана Патапчык, падсумоўваючы яго вынікі, гэта не выпадкова. Федэрацыя прафсаюзаў Беларусі з’яўляецца самай масавай грамадскай арганізацыяй краіны.
Кожны з нас разумее каштоўнасць такіх простых рэчаў, як мірная праца, салідарнасць, узаемадапамога. Таму, толькі разам працуючы для дасягнення пастаўленых мэтаў, наша грамадства будзе развівацца і рухацца наперад.
Тэкст і фота
Андрэя СУПІТАЛЁВА.
Андрэя СУПІТАЛЁВА.
Поделиться: