22 верасня ў Беларусі праводзіцца штогадовая міжнародная акцыя “Дзень без аўтамабіля”, якая накіравана на прыцягненне ўвагі грамадскасці да праблемы шкоднага ўплыву на стан навакольнага асяроддзя і здароўе насельніцтва ад залішняга выкарыстання ўласнага транспарту.
Сёння немагчыма ўявіць сабе сучасны свет без аўтамабіляў. Безумоўна, усе мы любім камфорт, а машына дорыць яго нам штодня. Але ў штодзённых клопатах мы не задумваемся аб тым, якую шкоду прыносіць аўтамабіль навакольнаму асяроддзю і кожнаму з нас.
Сярод крыніц забруджвання атмасфернага паветра выкіды ад аўтатранспарту займаюць першае месца. У выхлапных газах машын утрымліваецца вялікая колькасць шкодных рэчываў, якія адмоўна ўплываюць на здароўе чалавека і кампаненты навакольнага асяроддзя (раслінны і жывёльны свет, глебу, ваду, будынкі, помнікі архітэктуры). Выкіды парніковых газаў ад аўтамабіляў уносяць негатыўны ўклад у змяненне клімату планеты.
Давайце ж задумаемся і зробім дружалюбны крок да захавання прыроды, пакінуўшы 22 верасня свой аўтамабіль на стаянцы або ў гаражы. Перасядзем у гэты дзень на веласіпед, грамадскі транспарт або пераадолеем шлях да працы (вучобы) пешшу.

Падтрымаем Міжнародную акцыю “Дзень без аўтамабіля” 22 верасня!

ВЫДАТКУЕМ АДЗІН ДЗЕНЬ НА КАРЫСЦЬ ЧЫСТАГА ПАВЕТРА!