Аграпрадпрыемства па вытворчасці зерня і дацкай беконнай свініны “Белдан” узводзіцца каля вёскі Ветка. Будаўніча-мантажныя работы распачалі спецыялісты ПМК №241 у ліпені бягучага года.
Зараз выканана закладка фундамента, устаноўлены калоны і цокальныя панелі свінарніка-рэпрадуктара – першага з двух самых вялікіх будучых памяшканняў. Рабочыя таксама прыступілі да мантажу другой пабудовы – свінарніка-адкормачніка. Закладваецца фундамент пад устаноўку калон.
– Свінакомплекс разлічаны на 53000 галоў жывёлы. Наступным этапам будаўніцтва стане ўзвядзенне склада для зерня, – паведаміў галоўны інжынер ПМК №241 Руслан ГАНЧАРОЎ. – Увогуле, у план будоўлі занесены 37 вытворчых і дапаможных памяшканняў, неабходных для гадоўлі свіней.
Карэспандэнт раёнкі выехала на месца, дзе ў будучым з’явіцца свінаферма. На будаўнічай пляцоўцы праца ў самым разгары. Работнікі ПМК №241 праводзяць першы цыкл работ па заліўцы фундамента і ўстаноўцы нясучых калон другога будынка.
– Хутка пачнём устаноўку калон свінарніка-адкормачніка. Працы тут яшчэ многа, – кажа электрагазазваршчык Леанід КУЗЬМЯНКОЎ.­