­У гэтай гаспадарцы, як вядома, традыцыі захоўваюць і актыўна ўкараняюць у жыццё, тым самым мацуючы духоўную сувязь хлебаробаў і зямлі, на якой яны жывуць і працуюць. Таму перад пачаткам вясенне-палявых работ бягучага года настаяцель Вішоўскай праваслаўнай царквы ў гонар апосталаў Пятра і Паўла айцец Павел правёў абрад  асвячэння тэхнікі сельгаспрадпрыемства, якая будзе задзейнічана ў пасяўной кампаніі. Але трэба аддаць належнае і самім механізатарам, якія яшчэ  да пачатку сезона забяспечылі стопрацэнтную гатоўнасць сельгастэхнікі і агрэгатаў.
Па словах галоўнага агранома гаспадаркі Аляксандра ЛЕЙБУЦІНА, сёлета ў СВК “Калгас “Радзіма” плануецца засеяць больш за 4 тысячы гектараў раллі. Зерневыя і зернебабовыя культуры зоймуць 1800 га, з іх 300 га выдзелены пад вырошчванне кукурузы на зерне. 1700 гектараў адведзены пад вырошчванне кукурузы на сілас і яшчэ 500 – пад аднагадовыя травы, якія таксама пойдуць на кармы жывёле.

Словы на добры шлях сейбітам выказалі старшыня гаспадаркі Аляксандр ЛАПАЦЕНТАЎ і духоўнай падтрымкі – айцец Павел. А самадзейныя артысты Вішоўскага СЦК і ВЧ парадавалі хлебаробаў традыцыйнымі вясновымі песнямі.
Права сыпануць на полі першыя зярняты было прадастаўлена механізатарам Юрыю ПЕТУШКОВУ, Міхаілу КУЛЯШОВУ і старшыні ветэранскай арганізацыі сельгаскааператыва Мікалаю СЕЛІВОНЧЫКУ. Услед за імі сваю працу распачалі магутныя пасяўныя агрэгаты, якімі кіравалі Ігар ШЧОЛУХАЎ і Міхаіл Куляшоў.
Усяго ў бягучай пасяўной кампаніі задзейнічаны 4 такія агрэгаты, а таксама дзве сеялкі дакладнага высеву для кукурузы на зерне і яшчэ 4 пасяўныя агрэгаты будуць высяваць гэту культуру на сілас. Дакладнасць і арганізаванасць, з якой мясцовыя аграрыі распачалі працу, а таксама блаславенне з нябёсаў дазволяць правесці сёлетнюю пасяўную кампанію якасна і без збояў. Як і ўсе папярэднія.

­