У нядзелю на машынным двары СВК “Калгас “Радзіма” адбылося ўрачыстае ўшанаванне абсалютных лідараў сёлетняй уборачнай кампаніі.
Экіпаж камбайна “Нью Холланд” у складзе заслужанага работніка сельскай гаспадаркі Мікалая ДАРЭЧКІНА і яго памочніка Канстанціна САЛАДУХІ перасягнуў трохтысячны рубеж па намалоце збожжа. Таксама некалькі экіпажаў зернеўборачных камбайнаў сельгаскааператыва і вадзіцелі аўтамабіляў сталі “тысячнікамі”.
Шчырыя словы віншаванняў усім хлебаробам адрасаваў старшыня райвыканкама Васіль ЗАХАРЭНКА. Ён выканаў і ганаровую місію – уручыў лідарам жніва вымпелы, падзякі і грашовыя прэміі ад райкама прафсаюза работнікаў АПК.
Падзякаваў удзельнікам уборачнай і старшыня СВК “Калгас “Радзіма” Аляксандр ЛАПАЦЕНТАЎ. У гутарцы з калектывам ён адзначыў, што важную ролю ў дасягненні рубяжа ў 3 тысячы тон адыграў новы камбайн, які сёлета першы сезон задзейнічаны ва ўборцы хлеба на палях гаспадаркі.
– Новы камбайн пакуль працуе ў эксперыментальных умовах, – дадаў старшыня сельгаскааператыва. – За гэты час мы ўсе ўпэўніліся, што па сваіх магчымасцях ён можа замяніць тры звычайныя. І ў сувязі з гэтым пераглядваем умовы працоўнага спаборніцтва для таго, каб усе ўдзельнікі жніва мелі роўныя магчымасці дастойна праявіць сябе ў працы.
Аляксандр Міхайлавіч уручыў грашовыя прэміі камбайнерам-“тысячнікам” Мікалаю і Артуру ЛЯНЕЎСКІМ, Івану АЎТУШЭНКУ і Сяргею ШАХРАЮ, вадзіцелям Міхаілу КАНЦАВОМУ і Сяргею ШАЛКОЎСКАМУ, якія перавезлі па тысячы тон збожжа новага ўраджаю.
Таксама старшыня сельгаскааператыва ўручыў прэміі механізатарам, занятым на прэсаванні саломы і транспарціроўцы збожжа на зернетаках.

­

Даведачна: На 17 жніўня ў СВК “Калгас “Радзіма” ўбрана больш за палову пасеяных плошчаў збожжавых культур. Намалот склаў больш за 12600 тон зерня пры сярэдняй ураджайнасці 56 ц/га.

Святлана МАГІЛЕЎЧ­ЫК.
Фота аўтара.