Выязны семінар-нарада аблвыканкама, на якім прааналізавана работа аграпрамысловага комплексу Магілёўшчыны, прайшоў на мінулым тыдні на тэрыторыі Бабруйскага і Бялыніцкага раёнаў.­

У рабоце семінара прынялі ўдзел старшыня аблвыканкама Леанід ЗАЯЦ, першы яго намеснік Анатоль УЛАСЕВІЧ, старшыні і першыя намеснікі райвыканкамаў, іншыя службовыя асобы, адказныя за работу галіны аграпрамысловага комплексу.

Пытанні, вынесеныя на парадак дня, тычыліся вынікаў работы жывёлаводчай галіны за студзень-красавік бягучага года, а таксама гатоўнасці сельгасарганізацый да нарыхтоўкі травяных кармоў на будучы зімова-стойлавы перыяд.

Было адзначана, што за справаздачны перыяд у дзейнасці галіны жывёлаводства рэгіёна маюцца пэўныя станоўчыя вынікі: рост вытворчасці малака да адпаведнага перыяду мінулага года склаў 9%, а сярэднясутачныя прыбаўкі на адкорме БРЖ павялічыліся на 3%. Аднак сёння патрабуецца значна больш істотны рост, якому перашкаджае незахаванне як тэхналагічнай, так і працоўнай дысцыпліны. Гэтыя прабелы вядуць да таго, што гаспадаркі зніжаюць узровень надояў малака і прыбаўкі ў вазе жывёлы. А ў шэрагу сельгасарганізацый вобласці зніжаецца пагалоўе малочнага статку і БРЖ у цэлым, у тым ліку па прычыне яго падзяжу. Усе гэтыя фактары ў комплексе вядуць да грунтоўных фінансавых страт.

Напружаныя і адказныя задачы, накіраваныя ў першую чаргу на павышэнне прадукцыйнасці жывёлаводчай галіны, стаяць перад Магілёўшчынай у час цяперашняй кампаніі па нарыхтоўцы травяністых кармоў.

Як нагадаў Анатоль Уласевіч, у арганізацыях сельскай гаспадаркі іх плануецца нарыхтаваць 1 млн 423 тыс. тон кармавых адзінак. А ў разліку на адну ўмоўную галаву жывёлы – 36,9 цэнтнера кармавых адзінак. Тэма непахіснаснага выканання тэхналагічных патрабаванняў вытворчасці і працоўнай дысцыпліны стала лейтматывам падчас наведвання ўдзельнікамі семінара і нашага раёна. Своечасовае скошванне траў як важнейшая ўмова для нарыхтоўкі сена і іншых відаў травяністых кармоў высокай якасці і ўвогуле строгае захаванне тэхналагічных аперацый пры нарыхтоўцы кожнага віда кармоў – менавіта аб гэтым вялася гутарка на полі шматгадовых траў паблізу МТК «Ключыкі» ААТ «Новая Друць», якое стала наступнай пляцоўкай у рабоце ўдзельнікаў нарады.

Леанід Заяц адзначыў высокую якасць пасеяных на полі плошчай 53 гектары сумесі люцэрны, клеверу і фестулоліўму.

– Зараз мы бачым поле шматгадовых траў, якія пасеяны па ўсіх тэхналогіях, што дазваляе, зразумела, пры своечасовай уборцы першага ўкосу, разлічваць не толькі на другі, але і трэці ўкос, і дасягнуць атрымання з аднаго гектара 50-60 тон цудоўнай зялёнай масы. Трэба памятаць: менавіта якасцю правядзення корманарыхтоўчай кампаніі і вызначаецца ўзровень эканомікі кожнай гаспадаркі. Не будзем мець добрых кармоў – не будзем мець добрых надояў, – падкрэсліў Леанід Канстанцінавіч.

Наступным аб’ектам для наведвання стаў малочнатаварны ко­мплекс «Іскра» ААТ «Аграсэрвіс». Тут удзельнікі семінара азнаёміліся з жывёлаводчымі памяшканнямі, асаблівую ўвагу надалі ўтрыманню цялят у індывідуальных доміках-прафілакторыях. Трэба адзначыць, што жывёлагадоўчаму кірунку ў гэтай гаспадарцы надаецца асаблівая ўвага, бо кіраўніцтва яе добра разумее: малако – асноўны складнік даходаў таварыства і базіс яе далейшага эканамічнага жыцця. 

– Выкарыстанне індывідуальных домікаў для маладняка ўжо даказала эфектыўнасць, а перавагі, сярод якіх ізаляцыя, свежае паветра, добрая гігіена і назіранне, відавочныя, – сказаў губернатар. – 29 красавіка прайшла нарада ў Прэзідэнта Беларусі Аляксандра Лукашэнкі, на якой пастаўлена задача ў найкарацейшыя тэрміны стварыць умовы для вырошчвання маладняка буйной рагатай жывёлы і забяспечыць захаванне пагалоўя. Мэта сённяшняй нашай сустрэчы ў гэтай гаспадарцы – паказаць простыя спосабы, якія сёння можа стварыць любы гаспадар. Тут няма звышнатуральных пабудоў, узводзяцца яны літаральна за лічаныя дні. Аднак станоўчы вынік іх выкарыстання відавочны.

Ніхто не дасць нам нічога звонку, не існуе такіх шчадрацоў, трэба працаваць самім.­ Тым больш што магчымасці і рэзервы для гэтага існуюць, – заключыў кіраўнік Прыдняпроўскага краю.

Вікторыя САВІНА.
Фота аўтара.

zara.by

Поделиться: